સરકારની તિજોરી છલોછલ, જીએસટી કલેક્શન 1.72 લાખ કરોડને પાર
ઓક્ટોબરમાં 13 ટકાનો વધારો, 2017 માં જીએસટી લોન્ચ થયા બાદ બીજીવાર હાઈએસ્ટ આવક,નાણા મંત્રાલયની જાહેરાત
જીએસટી કલેક્શનથી કેન્દ્ર સરકારની તિજોરી પાછલા કેટલાક સમયથી છલકાઈ રહી છે અને તંત્રનો ઊતસાહ પણ વધી રહ્યો છે. સરકારની અપેક્ષા મુજબ જ હવે કલેક્શન હાઈએસ્ટ થઈ રહ્યું છે. 2017માં જીએસટી લોન્ચ થયા બાદ બીજી વાર સરકારને સૌથી વધારે જીએસટી કલેક્શન મળ્યું છે. ઓક્ટોબર-નવેમ્બરમાં તહેવારોને કારણે સરકારની જીએસટીની આવકમાં વધારો થયો છે. ઓક્ટોબર 2023માં 1.72 લાખ કરોડનું જીએસટી કલેક્શન રહ્યું છે .સીધો 13 ટકાનો વધારો નોંધાયો છે.
નાણાં મંત્રાલયે ઓક્ટોબર 2023 માટે જીએસટી કલેક્શનના આંકડા જાહેર કર્યા હતા. જે મુજબ ઓક્ટોબરમાં જીએસટી કલેક્શન 1,72,003 કરોડ રૂપિયા છે. તેમાંથી 30,062 કરોડ રૂપિયા સીજીએસટી, 38,171 કરોડ રૂપિયા એસજીએસટી, 91,315 કરોડ રૂપિયા આઇજીએસટી અને 12,456 કરોડ રૂપિયા સેસ છે.
નાણાકીય વર્ષ 2023-24માં સરેરાશ જીએસટી કલેક્શન 1.66 લાખ કરોડ રૂપિયા રહ્યું છે, જે 11 ટકા વધારે છે. આ સાથે જ ગત વર્ષે ઓક્ટોબર મહિનાની તુલનામાં આ વર્ષે ઓક્ટોબરમાં જીએસટી કલેક્શન 13 ટકા વધારે રહ્યું છે. ઘરેલુ વ્યવહારોથી આવકમાં 13 ટકાનો ઉછાળો આવ્યો છે.
ઓક્ટોબર-નવેમ્બરમાં નવરાત્રી, દશેરા, કરવા ચોથ, દિવાળી સહિતના ઘણા તહેવારો છે એટલે સરકારને સૌથી વધારે જીએસટી કલેક્શન મળ્યું છે. તહેવારોમાં લોકો છૂટથી વસ્તુઓ ખરીદતા હોય છે. ખરીદાયેલી વસ્તુઓ પર જીએસટી લાગે છે. આ રીતે લોકો જેટલી વધારે ખરીદી કરે તેટલી સરકારને જીએસટીની વધારે આવક થાય છે.
