કાશ્મીરમાં તાજી હિમવર્ષા : અનેક વિસ્તારો બરફની ચાદરથી ઢંકાયા

શિયાળાના આગમનની સાથે આજે હળવો વરસાદ અને હિમવર્ષા થવાની ધારણા

શિયાળાના આગમનની સાથે જ જમ્મુ અને કાશ્મીરની ગુરેઝ ખીણ તાજી હિમવર્ષાને કારણે બરફની સુંદર ચાદરથી ઢંકાઈ ગઈ છે. ઉત્તર કાશ્મીરના મનોહર બાંદીપોરા જિલ્લામાં સ્થિત ગુરેઝ ખીણ સોમવારે સવારે બરફની નવી ચાદરથી ઢંકાઈ ગઈ હતી. ખાસ કરીને કિલ્શાય ટોપ, તુલૈલ અને આસપાસના ગામોમાં હિમવર્ષા થઈ હતી, જે શિયાળાની શરૂઆતનો સંકેત આપે છે. હવામાનમાં આ ફેરફાર ભારતીય હવામાન વિભાગની આગાહી મુજબ છે.

નબળું વેસ્ટર્ન ડીસટર્બન્સ હાલમાં જમ્મુ અને કાશ્મીરને અસર કરી રહ્યું છે. આ હવામાન પરિવર્તનને કારણે 12 નવેમ્બરે કેન્દ્રશાસિત પ્રદેશના વિવિધ ભાગોમાં હળવો વરસાદ અને હિમવર્ષા થવાની ધારણા છે. હવામાન વિભાગે આગામી 3 દિવસમાં ગુરેઝ ખીણ સહિત કાશ્મીર વિભાગના ઉચ્ચ વિસ્તારોમાં ભારેથી અતિ ભારે હિમવર્ષાની ચેતવણી જારી કરી છે. સ્થાનિક રહેવાસીઓ અને પ્રવાસીઓને બદલાતા હવામાન માટે તૈયાર રહેવાની સલાહ આપવામાં આવી છે. સોમવારની રાત્રે રાઝદાન ટોપ, સિંથાન ટોપ, પીર કી ગલી, ગુલમર્ગના ફેઝ 2, પહેલગામ અને સોનમર્ગમાં હિમવર્ષા થઈ હતી.

બીજી તરફ ઉત્તરાખંડ અને હિમાચલ પ્રદેશમાં નવેમ્બરના અંતમાં અથવા ડિસેમ્બરના પહેલા અઠવાડિયામાં હિમવર્ષા અને વરસાદની સંભાવના છે. હાલ હિમાચલમાં ગાઢ ધુમ્મસ છે.