કેનેડામાં પંજાબી સિંગર એપી ધીલોનના ઘર પર ફાયરિંગ : લોરેન્સ બિશ્નોઇ ગેંગે જવાબદારી લીધી, ભાઈજાન સાથે કનેક્શન

થોડા સમય પહેલા સલમાન ખાનના ઘર પર ફાયરિંગ થયું હતું ત્યારે હવે પંજાબી સિંગરના ઘરની બહાર ફાયરિંગની ઘટના સામે આવી છે. કેનેડાના વાનકુવરમાં પંજાબી ગાયક એપી ધિલ્લોનના ઘરની બહાર ફાયરિંગની ઘટનાએ ખળભળાટ મચાવી દીધો છે. વિક્ટોરિયા આઇલેન્ડ પર બનેલી આ ઘટનાએ બધાને ચોંકાવી દીધા હતા. એપી ધિલ્લોનનું ઘર અહીં છે. ગોળીબાર બાદ સુરક્ષા એજન્સીઓ હવે આ મામલાની ઊંડાણપૂર્વક તપાસ કરી રહી છે અને ફાયરિંગના ગુનેગારોની હજુ સુધી ઓળખ થઈ શકી નથી.

લોરેન્સ બિશ્નોઈ ગેંગે ફાયરિંગની જવાબદારી લીધી

લોરેન્સ બિશ્નોઈ અને રોહિત ગોદારા ગેંગે ફાયરિંગની જવાબદારી લીધી છે. આ મામલામાં સોશિયલ મીડિયા પર એક પોસ્ટ ઝડપથી વાયરલ થઈ રહી છે, જેમાં દાવો કરવામાં આવ્યો છે કે 1 સપ્ટેમ્બરની રાત્રે વિક્ટોરિયા આઈલેન્ડ અને વુડબ્રિજ, ટોરોન્ટો, કેનેડામાં ફાયરિંગ કરવામાં આવ્યું હતું. આ પોસ્ટમાં દાવો કરવામાં આવ્યો છે કે લોરેન્સ બિશ્નોઈ અને રોહિત ગોદારાએ બંને ઘટનાઓની જવાબદારી લીધી છે. પોસ્ટમાં એવું પણ લખવામાં આવ્યું છે કે ધિલ્લોનના બંગલામાં ફાયરિંગ કરવામાં આવ્યું છે, આ સાથે સલમાન ખાન અને ધિલ્લોનના સંબંધો વિશે પણ ટિપ્પણી કરવામાં આવી છે.

શું લખ્યું હતું પોસ્ટમાં?

પોસ્ટમાં ધમકીભર્યા શબ્દોમાં કહેવામાં આવ્યું છે કે અમે ખરેખર એવું જીવન જીવી રહ્યા છીએ જે અંડરવર્લ્ડ લાઇફની નકલ કરે છે. આ સાથે એવી ચેતવણી પણ આપવામાં આવી છે કે જો કોઈ પોતાની મર્યાદામાં નહીં રહે તો તેને પરિણામ ભોગવવા પડશે. સુરક્ષા એજન્સીઓ આ પોસ્ટની સત્યતા ચકાસવામાં વ્યસ્ત છે અને ફાયરિંગનું કારણ પણ જાણવાનો પ્રયાસ કરી રહી છે.

ગિપ્પી ગ્રેવાલના ઘરે પણ ગોળીઓ છોડવામાં આવી

આ ઘટના પહેલા પણ લોરેન્સ બિશ્નોઈ ગેંગ દ્વારા આવી જ એક ઘટના બની હતી. થોડા મહિના પહેલા ગોલ્ડી બિશ્નોઈ ગેંગે વિદેશમાં ગિપ્પી ગ્રેવાલના ઘરે ગોળીબાર કર્યો હતો. કેનેડિયન પોલીસે આ મામલે હજુ સુધી કોઈ સત્તાવાર નિવેદન આપ્યું નથી અને ન તો કોઈની ધરપકડ કરવામાં આવી છે.

સલમાન ખાનના ઘર પર ફાયરિંગ

આ કેસ લોરેન્સ બિશ્નોઈ ગેંગનો વધતો પ્રભાવ દર્શાવે છે. આ પહેલા પણ 14 એપ્રિલ 2023ના રોજ પણ બાંદ્રામાં સલમાન ખાનના ગેલેક્સી એપાર્ટમેન્ટમાં ફાયરિંગ કરવામાં આવ્યું હતું. આ ઘટનાને બે મોટરસાઇકલ સવારોએ અંજામ આપ્યો હતો. પોલીસે ઘટનાના બે દિવસ બાદ ગુજરાતમાંથી વિકી ગુપ્તા અને સાગર પાલની ધરપકડ કરી હતી અને બિશ્નોઈ ગેંગે હુમલાની જવાબદારી સ્વીકારી હતી.

એપી ધિલ્લોનના ઘરની બહાર થયેલા ગોળીબારથી માત્ર કેનેડામાં જ નહીં, ભારતમાં પણ સુરક્ષા એજન્સીઓની ઊંઘ હરામ થઈ ગઈ છે. આ ઘટના દર્શાવે છે કે અંડરવર્લ્ડ ગેંગની ગતિવિધિઓ હવે આંતરરાષ્ટ્રીય સ્તરે પણ ફેલાઈ રહી છે. હવે જોવાનું એ રહે છે કે આ ઘટના બાદ સુરક્ષા એજન્સીઓ અને કેનેડા પોલીસ આ મામલે શું કાર્યવાહી કરે છે.