હરિયાણા માટે 2019માં પણ એક્ઝિટ પોલ ખોટા સાબિત થયા હતા
એકઝિટ પોલની વિશ્વસનીયતા ઓછી થતી જાય છે..
હરિયાણા વિધાનસભાની ચૂંટણીનાં પરિણામ જોતાં બધા એક્ઝિટ પોલ ખોટા પુરવાર થયા છે. મોટાભાગના એક્ઝીટ પોલમાં ભાજપને હરિયાણામાં એન્ટીઈમ્કમ્બંસી નડશે અને કોંગ્રેસની સત્તા આવશે તેવું અનુમાન લગાવવામાં આવ્યું હતું પરંતુ મંગળવારે પરિણામના દિવસે આ અનુમાનો ખોટા સાબિત થયા છે.
આ પહેલાં વર્ષ 2019માં પણ હરિયાણા વિધાનસભાની ચૂંટણીના એક્ઝિટ પોલમાં અંદાજ લગાવવામાં આવ્યો હતો કે ભાજપને 61 સીટો મળશે, જ્યારે કેટલાક અન્ય એક્ઝિટ પોલમાં 75-80 સીટો જીતવાનો અંદાજ વ્યક્ત કરવામાં આવ્યો હતો. જોકે એક્ઝિટ પોલથી બિલકુલ અલગ પરિણામો આવ્યાં હતાં. ત્યારે ભાજપને 40 સીટો પર જીત મળી હતી અને કોંગ્રેસને 31 સીટો જીતવામાં સફળ રહી હતી. જે એક્ઝિટ પોલના ભાજપના સ્પષ્ટ બહુમતના અંદાજથી વિરુદ્ધ હતાં.
આ વખતે એક્ઝિટ પોલના અનુમાનથી ઉત્સાહિત કોંગ્રેસ 10 વર્ષ પછી સત્તામાં વાપસીની અપેક્ષા રાખી રહ્યો હતો જો કે, આ અનુમાન ખોટા સાબિત થયા છે.
આ વર્ષની લોકસભા ચૂંટણીમાં મોટા ભાગના એક્ઝિટ પોલે ભાજપના નેતૃત્વવાળી સત્તારૂઢ NDAની બમ્પર જીતની ભવિષ્યવાણી કરી હતી.એ સાથે અંદાજ લગાવ્યો હતો કે ભાજપ એકલા દમ પર બહુમત આંકડાથી ક્યાંય વધુ સીટો જીતશે, જેમાં NDAને 361થી 401 સીટો મળવાનો અંદાજ વ્યક્ત કરવામાં આવ્યો હતો. જોકે એક્ઝિટ પોલનાં પરિણામો ખોટાં સાબિત થયાં હતાં.NDAએને 293 સીટો મળી હતી ને ભાજપના ખાતામાં 240 સીટો આવી હતી.આવી સ્થિતિમાં એકઝિટ પોલની વિશ્વસનીયતા ઓછી થતી જાય છે તેમ ચોક્કસપણે કહી શકાય.
