રાજ્યસભાની 6 બેઠકો માટે 20 ડિસેમ્બરે ચૂંટણી
આંધ્ર પ્રદેશ, ઓડિશા, પશ્ચિમ બંગાળ અને હરિયાણામાં હલચલ શરુ
ચૂંટણી પંચે રાજ્યસભાની 6 ખાલી બેઠકો માટે ૨૦ ડીસેમ્બરના રોજ ચૂંટણી યોજવા માટે નોટિફિકેશન બહાર પાડ્યું છે. આ ચૂંટણી આંધ્ર પ્રદેશ, ઓડિશા, પશ્ચિમ બંગાળ અને હરિયાણા માટે યોજાશે.અહી રાજકીય હલચલ શરુ થઇ ગઈ છે.
ચૂંટણી પંચના જણાવ્યા અનુસાર, રાજ્યસભા માટે નામાંકન પ્રક્રિયા 3 ડિસેમ્બરથી શરૂ થશે. 10 ડિસેમ્બર સુધી નામાંકન કરી શકાશે. 11મી ડિસેમ્બરે નામાંકનની ચકાસણી કરવામાં આવશે. 13 ડિસેમ્બર સુધી નામાંકન પરત ખેંચી શકાશે. 20 ડિસેમ્બરે સવારે 9 થી સાંજે 4 વાગ્યા સુધી ચૂંટણી યોજાશે. સાંજે 5 વાગ્યાથી મતગણતરી શરૂ થશે.
આંધ્રપ્રદેશમાં સૌથી વધુ બેઠકો ખાલી છે. અહીં ત્રણ બેઠકો પર રાજ્યસભાની ચૂંટણી યોજાશે. જગન મોહન રેડ્ડીની YSRCPના ત્રણ સાંસદો, વેંકટરામન રાવ મોપીદેવી, બીધા મસ્તાન રાવ યાદવ અને રાયગા કૃષ્ણૈયાએ રાજ્યસભામાંથી રાજીનામું આપી દીધું હતું, જેના કારણે નવા સભ્યો માટે ચૂંટણી યોજાશે. આંધ્રપ્રદેશના મુખ્યમંત્રી ચંદ્ર બાબુ નાયડુની તેલુગુ દેશમ પાર્ટી (ટીડીપી) આ ત્રણેય બેઠકો સરળતાથી જીતી શકે છે.
ઓડિશામાં રાજ્યસભાની એક બેઠક માટે ચૂંટણી યોજાશે. નવીન પટનાયકની આગેવાની હેઠળના બીજેડી સાંસદ સુજીત કુમારે રાજ્યસભામાંથી રાજીનામું આપી દીધું હતું. રાજ્યમાં આ બેઠક ભાજપને મળે તેવી શક્યતા છે. કારણ કે ભાજપે અહીં પહેલીવાર પૂર્ણ બહુમતી સાથે સરકાર બનાવી છે.
પશ્ચિમ બંગાળમાં સત્તારૂઢ તૃણમૂલ કોંગ્રેસ (TMC)ના જવાહર સરકારે રાજ્યસભાના સભ્ય પદ પરથી રાજીનામું આપી દીધું હતું. પશ્ચિમ બંગાળના મુખ્યમંત્રી મમતા બેનર્જીની ટીએમસી આ સીટ આરામથી જીતી શકે છે.
હરિયાણામાં સત્તારૂઢ ભાજપના કૃષ્ણલાલ પંવારે તાજેતરમાં રાજ્યસભાની બેઠક પરથી રાજીનામું આપ્યું છે. ભાજપ આ સીટ સરળતાથી જીતી શકે છે. કૃષ્ણ લાલ પંવાર તાજેતરમાં જ હરિયાણા વિધાનસભાની ચૂંટણી ઈસરાના મતવિસ્તારમાંથી લડ્યા હતા અને જીત્યા પણ હતા. તેઓ હવે નયબ સિંહ સૈની કેબિનેટમાં કેબિનેટ મંત્રી છે.
