પેપર લીક કેસમાં કાર્યવાહી, એક અપક્ષ ધારાસભ્ય હુડલાના ઘરે પણ તપાસ, યુવા કોંગીનું વિરોધ પ્રદર્શન, ચુંટણીટાણે જ દરોડાના અનેક આરોપો વચ્ચે રાજકીય ટકરાવ
રાજસ્થાનમાં વિધાનસભા ચૂંટણી થવાની છે અને મુખ્ય હરીફો વચ્ચે જોરદાર પ્રચાર યુધ્ધ શરૂ થયું છે ત્યારે રાજસ્થાન કોંગ્રેસના પ્રમુખ ગોવિંદસિંહ ડોટાસરા પર ઈડી દ્વારા મોટી કાર્યવાહી કરવામાં આવી હતી. પેપર લીક કેસમાં સંડોવણીના આરોપો હેઠળ તેમના પર દરોડાની કાર્યવાહી કરવામાં આવી હતી. જો કે યુવા કોંગીના કાર્યકરોએ રેડના વિરોધમાં પ્રદર્શન કર્યું હતું અને આ મામલો ગરમ બની ગયો છે.
બીજી તરફ ઈડીએ અપક્ષ ધારાસભ્ય ઓમપ્રકાશ હુડલાના ઘરે પણ દરોડા પાડ્યા હતા. હુડલાએ ગેહલોત સરકારને બચાવવામાં મદદ કરી હતી. તાજેતરમાં કોંગ્રેસે તેમને મહુવાથી પોતાના ઉમેદવાર બનાવ્યા છે. તેથી અટકળો લાગવામાં આવી રહી છે કે તે કોંગ્રેસમાં જોડાતાની સાથે જ ઈડીના નિશાના પર આવી ગયા છે.
ઈડીએ રાજસ્થાનના પૂર્વ શિક્ષણ મંત્રી અને કોંગ્રેસ નેતા ગોવિંદ સિંહના જયપુર અને સીકરના ઘરે દરોડા પડ્યા હતા. રાજ્યમાં 7 સ્થળો પર કાર્યવાહીની પણ માહિતી બહાર આવી હતી. ઈડીએ રાજસ્થાનમાં પેપર લીક કેસમાં ભૂપેન્દ્ર સરનની મની લોન્ડરિંગના આરોપસર ધરપકડ કરી હતી.
રાજસ્થાન પોલીસની એફઆરઆઈના આધારે ઈડી એ ભૂપેન્દ્ર સરન અને અન્ય લોકો સામે પણ મની લોન્ડરિંગની તપાસ શરૂ કરી હતી. તપાસમાં બહાર આવ્યું છે કે ભૂપેન્દ્ર સરને અન્ય આરોપીઓ સાથે મળીને શિક્ષક ગ્રેડ II સ્પર્ધાત્મક પરીક્ષા 2022નું જનરલ નોલેજ પેપર લીક કર્યું હતું.
