હાલમાં ભારતમાં બે એરબેગ્સ ફરજિયાત છે
વાહનોની કિંમત વધી જશે, પરંતુ એકંદરે સુરક્ષાની ચિંતા હળવી થશે.
ભારતમાં હાઈ-વે ઉપર થતા ફેટલ એકસીડન્ટની સંખ્યા ને ધ્યાનમાં રાખીને રોડ સેફ્ટીમાં વધારો કરવા માટે કંપનીઓ વાહનમાં એર બેગ્સની સંખ્યા વધારવા વિચારી રહી છે. હાલમાં ભારતમાં બે એરબેગ્સ ફરજિયાત છે અને બહુ ઓછા વાહનોમાં 6 એરબેગ્સ આવે છે. જોકે, હવે ટોચની ઓટો કંપનીઓ દરેક કાર અને એસયુવીમાં 6 એરબેગ્સ સ્ટાન્ડર્ડ કરવા વિચારી રહી છે. તેનાથી વાહનોની કિંમત વધી જશે, પરંતુ એકંદરે સુરક્ષાની ચિંતા હળવી થશે.
ભારતમાં દરરોજ જે એક્સિડન્ટલ ડેથ થાય છે તેમાંથી ઘણા મૃત્યુ એવા છે જે એરબેગ્સના કારણે ટાળી શકાય તેવા હોય છે. પરંતુ ભારત પ્રાઈસ સેન્સિટિવ માર્કેટ હોવાના કારણે લોકો ખર્ચ બચાવવા માટે ઓછી સેફ કાર ખરીદતા હોય છે.
અત્યાર સુધી ભારતમાં પ્રીમિયમ અને લક્ઝરી કેટેગરીની કાર કે એસયુવીમાં જ 6 એરબેગ્સ આપવામાં આવતી હતી, પરંતુ હવે મારુતિ, હ્યુન્ડાઈ, ટાટા, હોન્ડા, મહિન્દ્રા સહિતની માસ કંપનીઓ દરેક કારમાં 6 એરબેગ્સ આપે તેવી શક્યતા છે. તેનું કારણ છે કે ભારતીય માર્કેટનું ચિત્ર બદલાઈ રહ્યું છે અને લોકો પણ સુરક્ષાની ફીચર્સને મહત્ત્વ આપવા લાગ્યા છે.
મોટા પ્રમાણમાં એરબેગ્સનું ઉત્પાદન કરવાથી તે વધુ એફોર્ડેબલ બનશે અને એવરેજ કારનો ભાવ એટલો બધો નહીં વધે. ગયા મહિને સરકારે સ્પષ્ટતા કરી હતી કે ભારતમાં 6 એરબેગ્સ ફરજિયાત નથી. હાલમાં માત્ર બે એરબેગ્સ ફરજિયાત છે. તેના કારણે હવે કેટલી એરબેગ્સ આપવી તે ઓટો કંપનીઓએ નક્કી કરવાનું છે.
પહેલી ઓક્ટોબરથી સરકારે ભારત ન્યૂ કાર એસેસમેન્ટ પ્રોગ્રામ શરૂ કર્યું છે જે લોકલ સ્તરે ઉત્પાદિત વાહનો માટે પ્રથમ ક્રેશ ટેસ્ટિંગ સ્ટાન્ડર્ડ છે. વિશ્વમાં કુલ વાહનોની સંખ્યામાં ભારતનો હિસ્સો માત્ર એક ટકા છે છતાં સૌથી વધુ એક્સિડન્ટ ભારતમાં થાય છે અને સૌથી વધુ મૃત્યુ તથા ગંભીર ઈજાઓ પણ ભારતમાં નોંધાય છે.
ભારતમાં 2023માં માસ માર્કેટમાં કારના અલગ અલગ 1443 વેરિયન્ટ છે જેમાંથી 46 ટકા કારમાં 6 એરબેગ્સ આવે છે. અગાઉ આ પ્રમાણ 10 ટકા કરતા પણ ઓછું હતું. એટલે કે ભારતીયો સેફ્ટી માટે જાગૃત થયા છે.
મારુતિ સુઝુકીની કારના 18 વેરિયન્ટમાં અત્યારે 6 એરબેગ્સ આવે છે. 2022માં માત્ર 8 વેરિયન્ટમાં આ સગવડ હતી. હ્યુન્ડાઈમાં આ પ્રમાણ 36થી વધીને 65 થયું છે. ટાટા મોટર્સમાં 18 વેરિયન્ટમાં 6 એરબેગ્સ આવતી હતી જે હવે 18 વેરિયન્ટમાં આવે છે. મહિન્દ્રામાં આ પ્રમાણ 28થી વધીને 30, ટોયોટામાં 42થી વધીને 49 અને કિયામાં 47થી વધીને 80 થયું છે. હોન્ડાની કારના 23 વેરિયન્ટમાં 6 એરબેગ્સ સ્ટાન્ડર્ડ આવતી હતી જે હવે વધીને 36 થયા છે.
