કોમર્શિયલ LPG સિલિન્ડરના ભાવમાં 39 રૂપિયાનો વધારો
સપ્ટેમ્બર મહિનાના પહેલા જ દિવસથી કોમર્શિયલ એલપીજી સિલિન્ડરના ભાવમાં 39 રૂપિયાનો વધારો કરવામાં આવ્યો છે. જોકે, ઘર વપરાશ માટેના ડોમેસ્ટિક સિલિન્ડરના ભાવમાં કોઈ ફેરફાર થયો નથી. ઓગસ્ટ મહિના બાદ સપ્ટેમ્બરમાં ફરી એકવાર ઓઈલ માર્કેટિંગ કંપનીઓએ એલપીજી સિલિન્ડરના ભાવમાં વધારો કર્યો છે.
આ અગાઉ 1 જુલાઈના રોજ બિઝનેસ અને વ્યાપારી સાહસોને રાહત આપવા માટે ઓઈલ માર્કેટિંગ કંપનીઓએ કોમર્શિયલ એલપીજી ગેસ સિલિન્ડરના ભાવમાં ઘટાડો કરવાની જાહેરાત કરી હતી. પહેલી જુલાઈએ 19 કિલોના કોમર્શિયલ એલપીજી સિલિન્ડરના ભાવમાં 30 રૂપિયાનો ઘટાડો કરવામાં આવ્યો હતો.
દર મહિનાની શરૂઆતમાં એલપીજી સિલિન્ડરના ભાવને આંતરરાષ્ટ્રીય ભાવની સાથે એડજસ્ટ કરવામાં આવે છે. તેમાં આંતરરાષ્ટ્રીય બજારમાં તેલના ભાવ, કરવેરા, પુરવઠા-માગની ગતિશીલતા વગેરેને ધ્યાનમાં રાખવામાં આવે છે અને તે મહત્વપૂર્ણ ભૂમિકા ભજવે છે.
