લો બોલો ! રાજકોટમાં સગીરવયે 119 લગ્ન થઇ ગયા…મેરેજ સર્ટિફિકેટની માંગ કરતાં જ ભાંડો ફૂટ્યો
પાસપોર્ટ કઢાવવું હોય, આધારકાર્ડ કઢાવવું હોય કે પછી કોઈ પણ સરકારી યોજનાનો લાભ લેવા કોઈ યુગલ માંગતું હોય તો ફરજિયાતપણે મેરેજ સર્ટિફિકેટ રજૂ કરવું પડે છે. જો કે 16 મહિનાની અંદર રાજકોટમાં 119 લગ્ન એવા થઈ ગયા હોવાનું સામે આવ્યું છે જેમાં કાં તો છોકરા કાં તો છોકરીની ઉંમર સગીરવયની હોય !
મહાપાલિકાના લગ્ન નોંધણી વિભાગ પાસેથી જાણવા મળેલી વિગતો પ્રમાણે 2024ના 12 મહિના દરમિયાન કુલ 6611 લગ્ન નોંધણી થઈ હતી તેમાંથી 90 લગ્નને માન્યતા આપવાનો ઈનકાર કરવામાં આવ્યો હતો. સરકાર દ્વારા લગ્ન માટે છોકરાની ઉંમર 21 વર્ષ અને છોકરીની ઉંમર 18 વર્ષ નિર્ધારિત કરવામાં આવી છે. દરમિયાન કોઈ યુગલ જ્યારે લગ્ન નોંધણી કરાવવા આવે ત્યારે તેની પાસેથી આધારકાર્ડ સહિતના પૂરાવા લેવામાં આવે છે. ખાસ કરીને આધારકાર્ડ જ્યારે સિસ્ટમમાં અપલોડ કરવામાં આવે ત્યારે સરકાર દ્વારા નક્કી કરાયેલી ઉંમર પ્રમાણે છોકરા કે છોકરીની ઉંમર ન હોય એટલે તુરંત જ નોંધણી રદ્દ કરવામાં આવે છે.
આ જ રીતે 2025ના ચાર મહિનાની અંદર 29 લગ્નની નોંધણી કરવાનો મહાપાલિકા દ્વારા ઈનકાર કરવામાં આવ્યો હતો. મતલબ કે છોકરાની ઉંમર 21 અને છોકરીની ઉંમર 18 વર્ષ પ્રમાણે આધારકાર્ડમાં તારીખ ન હોય એટલે આપોઆપ અરજી નામંજૂર કરાય છે. જો કે એક વખત લગ્ન થઈ જાય એટલે તેની નોંધણી જરૂરી હોવા ઉપરાંત મેરેજ સર્ટિફિકેટ પણ જરૂરી હોવાથી યુગલ દ્વારા નિયમ જાણ્યા વગર અરજી કરી દેવાતી હોવાથી તેને નામંજૂર કરવાની સાથે જ બ્લેકલિસ્ટ પણ કરવામાં આવે છે.
119 પૈકી અમુક પુગલે પરિવારની જાણ બહાર પ્રેમલગ્ન તો અમુકે નાની ઉંમર હોવા છતાં લગ્ન કરવાની હિંમત કરી લીધી હોય મેરેજ સર્ટિફિકેટ કઢાવવા માટે મહાપાલિકાએ સર્ટિફિકેટ ન આપ્યું તો ગ્રામ પંચાયત તરફ દોટ મુકી હોવાનું પણ જાણવા મળ્યું છે. અહીં તલાટીનો છેડો’ શોધી વચલો રસ્તો કાઢયા બાદ સર્ટિફિકેટ મેળવી લેવાતું હોવાનું પણ બહાર આવ્યું છે.
