ઉધાર જીવનનો આધાર : જુલાઈમાં ક્રેડિટ કાર્ડથી દેશવાસીઓએ રૂપિયા ૧.૭ લાખ કરોડ ખર્ચી નાખ્યા
દેશમાં મોંઘવારીનો દેકારો થઈ રહ્યો છે પરંતુ સાથોસાથ લોકો ખર્ચ કરવામાં પણ જરાય પાછળ રહ્યા નથી. ખાસ કરીને ક્રેડિટ કાર્ડથી ખર્ચ કરવામાં ભારતીય યૂઝર્સ દ્વારા નવો રેકોર્ડ બનાવવામાં આવ્યો છે. જુલાઈ મહિનામાં લોકોએ ક્રેડિટ કાર્ડથી લાખો-કરોડ રૂપિયા ખર્ચી નાખ્યા હતા અને પાછલા વર્ષનો રેકોર્ડ પણ તોડી નાખ્યો હતો.
એસબીઆઈ સિક્યુરિટીઝના એક અહેવાલમાં એવી માહિતી આપવામાં આવી છે કે, દેશના ક્રેડિટ કાર્ડ હોલ્ડરોએ ચાલુ વર્ષે જુલાઈ માસમાં ક્રેડિટ કાર્ડથી રૂા.૧.૭ લાખ કરોડ ખર્ચી નાખ્યા હતા. આ રકમ પાછલા વર્ષની સમાન અવધિની તુલનામાં ૧૯ ટકા વધુ છે. આમ, ઉધાર જીવનનો એક આધાર બની ગયો છે.
રિપોર્ટમાં એવી માહિતી પણ અપાઈ છે કે, ખર્ચની બાબતમાં એચડીએફસી બેન્ક આગળ રહી છે. જુલાઈમાં એચડીએફસીના ક્રેડિટ કાર્ડ યૂઝર્સે કુલ ૪૪,૩૬૯ કરોડ ખર્ચી નાખ્યા હતા. સૌથી વધુ ક્રેડિટ કાર્ડના ઉપયોગમાં પણ એચડીએફસી બેન્ક આગળ જ રહી છે. જુલાઈમાં કુલ ૩૮.૪ કરોડ ટ્રાન્ઝેકશન થયા હતા. આ સંખ્યા પાછલા વર્ષની સમાન અવધિની સરખામણીએ ૩૯ ટકા વધુ છે.
આ અહેવાલ પરથી એવું ફલિત થાય છે કે, લોકો વ્યવહાર માટે ક્રેડિટ કાર્ડ પર પણ યુપીઆઈની જેમ જ ભરોસો કરી રહ્યા છે.
વ્યવહારના મામલામાં પણ એચડીએફસી બેન્ક સૌથી આગળ રહી હતી. આ બેન્કના ક્રેડિટ કાર્ડ ધારકોએ જુલાઈમાં સૌથી વધુ વ્યવહાર કર્યા અને તેની સંખ્યા ૯.૯ કરોડ રહી હતી. ૭.૧ કરોડ વ્યવહાર સાથે આઈસીઆઈસીઆઈ બીજા નંબરે અને એસબીઆઈ ત્રીજા નંબરે રહી છે.આમ, મોંઘવારીના દિવસોમાં પણ ઉધાર દેશવાસીઓ માટે એક આધાર બની ગયો છે અને ક્રેડિટ કાર્ડથી ખર્ચ કરવાની બાબતમાં દેશમાં નવા નવા રેકોર્ડ બની રહ્યા છે અને તેની સંખ્યા ઉત્તરોત્તર વધી રહી છે.
