કેન્દ્ર સરકારનું કડક વલણ : આધાર -પાન કાર્ડનો ડેટા વેચતી 3 વેબસાઇટ બ્લોક, અન્ય વેબસાઈટોને પણ ચેતવણી
કેન્દ્ર સરકારે કેટલીક વેબસાઇટ્સને બ્લોક કરી છે જે ભારતીય નાગરિકોની સંવેદનશીલ વ્યક્તિગત માહિતીને ઉજાગર કરે છે, જેમાં આધાર અને પાન કાર્ડની વિગતોનો સમાવેશ થાય છે. અહેવાલો કહે છે કે આ વેબસાઇટ ગ્રાહકોના આધાર અને પાન નંબર ડેટા વેચતી હતી. ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલય હેઠળની ઈન્ડિયન કોમ્પ્યુટર ઈમરજન્સી રિસ્પોન્સ ટીમને વેબસાઈટમાં સુરક્ષા ખામીઓ મળ્યા બાદ આ કાર્યવાહી કરવામાં આવી હતી.
આ પગલામાં, યુનિક આઈડેન્ટિફિકેશન ઓથોરિટી ઓફ ઈન્ડિયાએ પણ આ વેબસાઈટ પર આધાર અધિનિયમ, 2016ની કલમ 29(4)નું ઉલ્લંઘન કરવાનો આરોપ લગાવીને પોલીસ સમક્ષ સત્તાવાર ફરિયાદ નોંધાવી છે. ઈન્ડિયન કોમ્પ્યુટર ઈમરજન્સી રિસ્પોન્સ ટીમએ તપાસ કરી અને આ વેબસાઈટોમાં ઘણી સુરક્ષા નબળાઈઓ મળી. પછી વેબસાઈટના માલિકોને આ સુરક્ષા સમસ્યાઓને કેવી રીતે ઠીક કરવી અને તેમના ઈન્ફોર્મેશન એન્ડ કોમ્યુનિકેશન ટેક્નોલોજી ઈન્ફ્રાસ્ટ્રક્ચરને કેવી રીતે મજબૂત બનાવવું તે અંગે વિગતવાર સૂચનાઓ આપવામાં આવી હતી.
આ વેબસાઈટ ડેટા લીક કરી રહી હતી
મનીકંટ્રોલના રિપોર્ટ અનુસાર, બે વેબસાઈટ ઈન્ડિયન એરોસ્પેસ એન્ડ એન્જિનિયરિંગ અને ધ સ્ટાર કિડ્ઝ આધાર ડેટા લીક કરી રહી હતી. રિપોર્ટમાં કહેવામાં આવ્યું છે કે નવી-મુંબઈ સ્થિત ઈન્સ્ટિટ્યૂટ ઈન્ડિયન એરોસ્પેસ એન્ડ એન્જિનિયરિંગ, જે એરક્રાફ્ટ મેઈન્ટેનન્સ પર ધ્યાન કેન્દ્રિત કરે છે, તે 26 સપ્ટેમ્બરની બપોર સુધી પણ આ સંવેદનશીલ માહિતી જાહેર કરી રહી હતી. બાળકોના વિકાસ માટેનું ઓનલાઈન પ્લેટફોર્મ સ્ટાર કીડ્ઝનું URL 25 સપ્ટેમ્બર સુધી આધારની વિગતો લીક કરતું હતું, પરંતુ હવે તેને નિષ્ક્રિય કરી દેવામાં આવ્યું છે.
