કારમાલિકો માટે માઠાં સમાચાર : થર્ડ-પાર્ટી વીમો મોંઘો થઇ શકે, IRDAIએ પ્રીમિયમ 18-25% વધારવાનું સૂચન કર્યું
આગામી સમયમાં કાર સહિતના વાહનધારકોને પોતાની ગાડીઓ માટે ઇન્સ્યુરન્સ ખરીદવાનું વધુ મોંઘુ પડી શકે છે. વાહનોના થર્ડ પાર્ટી વીમામાં 18 થી 25 ટકા જેટલો વધારો કરવાનો પ્રસ્તાવ સરકાર સમક્ષ મુકવામાં આવ્યો છે. જો કે સરકારનું વલણ એવુ છે કે વધારો લાગુ કરતા પહેલા લોકો પાસેથી સુચનો મેળવવામાં આવશે અને તેની સમીક્ષા કરવામાં આવ્યા બાદ ફાઇનલ નિર્ણય લઇ શકાશે.
ઇરડા દ્વારા કેન્દ્રના માર્ગ પરિવહન મંત્રાલય સમક્ષ વધારાનો પ્રસ્તાવ રજૂ કરવામાં આવ્યો છે. જેમાં 18 ટકાથી 25 ટકા સુધીનો વધારો કરવાનું સુચન કરવામાં આવ્યું છે. જો કે આ પ્રસ્તાવ અંગે મંત્રાલય દ્વારા સમિક્ષા કરવામાં આવશે અને કેબિનેટની મંજૂરી હશે તો તેને લાગુ કરવામાં આવશે. વિમા ક્ષેત્રના નિષ્ણાંતોના જણાવ્યા મુજબ ટુ-વ્હીલરનું પ્રિમીયમ પણ વધી શકે છે.
આ પણ વાંચો : “મને સ્નેહલે ઉશ્કેર્યો એટલે મેં હત્યા કરી” લૂંટ વિથ મર્ડરની ઘટનાના રિકન્સ્ટ્રક્શન સમયે આરોપી કિશન ‘પોપટ’ બન્યો
350 સીસીના થર્ડ-પાર્ટી ઇન્સ્યુરન્સ પ્રિમીયમ અત્યારે અંદાજે 2800 રૂપિયા છે જો 18 ટકાનો વધારો કરવામાં આવે તો આ રકમ 3300 રૂપિયા થઇ શકે છે. એ જ રીતે ફોરવ્હીલમાં 1500 સીસીની કાર માટે અત્યારે 7900 રૂપિયા પ્રિમીયમ ચુકવવુ પડે છે જ્યારે ૧૮ ટકાનો વધારો થાય તો આ રકમ 9870 રૂપિયા થઇ શકે છે. મોંઘવારીના દિવસોમાં અને બે રોજગારીના દેકારા વચ્ચે જો વાહનોનો થર્ડ-પાર્ટી વીમો 18 થી 25 ટકા જેટલો મોંઘો થઇ જશે તો લોકોએ વધુ પૈસા ચુકવવા પડશે.
