પૂર્વ ક્રિકેટર રોબિન ઉથપ્પા સામે ધરપકડ વોરંટ જારી : 23 લાખ રૂપિયાનો PF ગોટાળાનો આરોપ
ક્રિકેટજગતમાંથી એક મોટા સમાચાર સામે આવી રહ્યા છે. ટીમ ઈન્ડિયાના પૂર્વ બેટ્સમેન રોબિન ઉથપ્પા વિરુદ્ધ ધરપકડ વોરંટ જારી કરવામાં આવ્યું છે. 39 વર્ષીય બેટ્સમેન પર પ્રોવિડન્ટ ફંડ કૌભાંડનો આરોપ છે. આ વોરંટ પ્રાદેશિક પીએફ કમિશનર સદક્ષરી ગોપાલ રેડ્ડીએ જારી કર્યું છે. રેડ્ડીના વોરંટ બાદ પુલકેશનગર પોલીસને જરૂરી કાર્યવાહી કરવા કડક સૂચના આપવામાં આવી છે
સેન્ચ્યુરીઝ લાઈફસ્ટાઈલ બ્રાન્ડ પ્રાઈવેટ લિમિટેડ નામની કંપનીનું સંચાલન કરી રહેલા રોબિન ઉથપ્પા પર આરોપ છે કે તેઓ તેમના કર્મચારીઓના પગારમાંથી પીએફ કાપી લે છે, પરંતુ તે રકમ તેમના કર્મચારીઓના ખાતામાં જમા કરાવતા નથી. જે બાદ તેમની સામે કાર્યવાહી કરવાની સૂચના આપવામાં આવી છે. ભારતીય ક્રિકેટર પર કુલ 23 લાખ રૂપિયાની ઉચાપતનો આરોપ છે.
Former Indian cricketer Robin Uthappa in the dock as an arrest warrant has been issued against him in a case related to Provident Fund fraud. He allegedly failed to deposit Rs 23 lakh in employee accounts. #RobinUthappa #Cricket pic.twitter.com/7IS6NMX7wE
— NewsFirst Prime (@NewsFirstprime) December 21, 2024
વોરંટ જાહેર થયું છતાં હજુ સુધી ધરપકડ થઈ નથી
પુલકેશનગર પોલીસને લેટર લખીને કમિશનર ગોપાલ રેડ્ડીએ કહ્યું છે કે આ વોરંટનો અમલ કરવામાં આવશે. બીજી તરફ ઉથપ્પાએ પોતાનું રહેઠાણ બદલ્યું છે, જેના કારણે પોલીસે આ વોરંટ પીએફ ઓફિસને પરત કરવું પડ્યું હતું. એ બાદ પોલીસ અને પીએફ વિભાગ પૂર્વ ક્રિકેટરના નિવાસસ્થાનની તપાસ કરી રહી છે. આ મામલો કર્મચારીઓની સુરક્ષા સાથે જોડાયેલો હોવાથી એને ગંભીરતાથી જોવામાં આવી રહ્યો છે. હાલમાં પોલીસ અને પીએફ વિભાગ બંને સંયુક્ત રીતે એની તપાસ કરી રહ્યાં છે.
ઉથપ્પાએ ભારત માટે 59 આંતરરાષ્ટ્રીય મેચ રમી છે.
રોબિન ઉથપ્પા ટીમ ઈન્ડિયાનો લોકપ્રિય ચહેરો છે. નિવૃત્તિ લેતા પહેલા, તે દેશ માટે કુલ 59 આંતરરાષ્ટ્રીય મેચ રમવામાં સફળ રહ્યો. આ દરમિયાન 54 ઇનિંગ્સમાં તેના બેટથી 1183 રન બનાવ્યા હતા. આંતરરાષ્ટ્રીય ક્રિકેટમાં તેના નામે સાત અડધી સદી છે.
