નાની ઉંમરમાં હાર્ટ એટેકથી યુવાનોના મોતનું પ્રમાણ વધતું જઈ રહ્યું છે ત્યારે આવો જ એક કિસ્સો રાજકોટ શહેરમાં આકાશવાણી ચોકમાં આવેલી SNK સ્કૂલમાં વોલીબોલ રમતી વેળાએ ધોરણ 12 નો વિધાર્થી અચાનક બેભાન થઈ ઢળી પડ્યો હતો. સારવારમાં ખસેડતાં તબીબે મૃત જાહેર કર્યો હતો. એકના એક લાડકવાયાના દીકરાના મોતથી માતા- પિતા શોકમાં ગરક થઈ ગયા હતા.
આ અંગની વિગતો મુજબ, ક્રિસ્ટલ મોલ પાછળ આવેલી પ્લેટિનિયમ હેરિટેજ નામનો બિલ્ડિંગમાં રહેતો એસ.એન કે સ્કૂલમાં ધોરણ 12 અભ્યાસ કરતો આદિત્ય અલ્કેશભાઈ વાછાણી ( ઉંમર 18) નામનો યુવક રવિવારે સાંજના સમયે સ્કૂલના ગ્રાઉન્ડમાં મિત્રો સાથે વોલીબોલ રમી રહ્યો હતો. દરમિયાન અચાનક જ આદિત્ય બેભાન થઈ જતા સાથી મિત્રોએ સ્કૂલની સામે જ આવેલી શાંતિ હોસ્પિટલમાં ખસેડયો હતો. જો કે અહીં તબીબે યુવકને મૃત જાહેર કર્યો હતો. ઘટના અંગે જાણ થતાં પરિવારજનો તેમજ યુનિવર્સિટી પોલીસ મથકનો સ્ટાફ હોસ્પિટલે દોડી જઇ જરૂરી કાર્યવાહી બાદ મૃતદેહને પીએમ અર્થે સિવિલ હોસ્પિટલમાં ખસેડવામાં આવ્યો હતો.
આ પણ વાંચો :રાજકોટની ચોક્કસ હોટેલોમાં પોલીસનું બેઠુ ભાગીદારી કવચ! બંધ બારણે જલ્સા પાર્ટીઓ?
પરિવારજનો પાસેથી જાણવા મળ્યા મુજબ, મૃતકના પિતા અલ્કેશભાઈને મેટોડામાં ફેક્ટરી છે. અને આદિત્ય તેમનો એકનો એક દીકરો હતો. આદિત્યને સ્પોર્ટ્સમાં રુચિ હોય જેથી તે જુદી જુદી ગેમ રમતો અને રવિવારે પણ મિત્રો સાથે સ્કૂલના ગ્રાઉન્ડમાં વોલીબોલ રમવા માટે ગયો હતો. તે એકદમ ફીટ હતો અને તેને નખમાં પણ રોગ ન હોવાનું પરિવારે જણાવ્યું હતું. બનાવ અંગે હાલ પોલીસે હાર્ટ એટેક આવ્યો હોવાની આશંકા વ્યક્ત કરી હતી જો કે મોતનું સચોટ કારણ તો પી.એમ રિપોર્ટ આવ્યા બાદ જ સામે આવશે.
ઉલ્લેખનીય છે કે, મેદસ્વીતા તેમજ આધુનિક લાઇફ સ્ટાઇલમાં ખોરાકમાં લેતા જંક ફૂડથી યુવાનોમાં હાર્ટ એટેક આવાનું એક કારણ હોય શકે પણ સ્પોર્ટ્સમેન તેમજ રોજ શારીરિક કસરત કરતા યુવાનોમાં પણ છેલ્લા કેટલાક સમયથી હાર્ટ એટેકથી મોતનું પ્રમાણ વધુ હોવાનું જાણવા મળ્યું છે ત્યારે અંગે સરકારે જરૂરી રિસર્ચ કરાવી લોકોને જાગૃત કરવા એ સમયની માંગ વર્તાય આવે છે.
