મહારાષ્ટ્રમાં ચૂંટણી પહેલા મુંબઈ પોલીસની મોટી કાર્યવાહી : ૮૦ કરોડની ચાંદી ભરેલો ટ્રક પકડી પાડ્યો

સામાન્ય રીતે ચૂંટણી દરમિયાન રોકડ રકમની હેરાફેરી થતી હોય છે અને તેને પકડવા માટે ચૂંટણી પંચ ચક્રવ્યૂહ પણ ગોઠવતું હોય છે. અત્યારે મહારાષ્ટ્રમાં મતદાન થવાનું છે અને ત્યાં રોકડ રકમની સાથે સાથે સોના અને ચાંદીની પણ મોટાપાયે હેરાફેરી થઇ રહી છે. મુંબઈ પોલીસ અને ચૂંટણી પંચે ચાંદી ભરેલો એક આખેઆખો ટ્રક પકડ્યો છે.

માનખુર્દ પોલીસ વાશી ચેક પોઈન્ટ ઉપર તપાસમાં હતી ત્યારે આ ટ્રક પકડાયો હતો. આ ટ્રકમાં 8,476 કિલો ચાંદી હતી. તેની કિંમત લગભગ 80 કરોડ રૂપિયા છે. ચાંદીનો આટલો મોટો જથ્થો જોઈ પોલીસ પણ ચોંકી ઉઠી હતી.

અધિકારીઓએ પૂછપરછ માટે ડ્રાયવરની અટકાયત કરી છે. પોલીસે આવકવેરા વિભાગ અને ચૂંટણી પંચની ટીમને ઘટનાસ્થળે બોલાવી હતી. હવે આવકવેરા વિભાગના અધિકારીઓ આ ચાંદીના માલિકને શોધી રહ્યા છે. પ્રાથમિક તપાસમાં બહાર આવ્યું છે કે ચાંદી ગેરકાયદેસર રીતે રાજ્યમાં ઘુસાડવામાં આવી છે, ત્યારે તેનો ચૂંટણી સંબંધિત કામકાજમાં ઉપયોગ થવાનો હતો કે શું તે અંગે પોલીસ તપાસ કરી રહી છે.