પોન્ઝી સ્કીમના નવા કાયદા હેઠળ 2000 પાનાનુ ચાર્જશીટ દાખલ
શેરબજારમાં રોકાણ કરવાની લાલચ આપીને ૬૦ લાખનું રોકાણ કરાવ્યુ હતુ
પોન્ઝી સ્કીમ હેઠળ ઠગાઇ કરનારને એક કરોડ સુધીનો દંડ પણ કરી શકાશે
પોન્ઝી સ્કીમમાં પોતાની મહેનતની કમાણી ગુમાવી ચુકેલા રોકાણકારોના હિતની રક્ષા કરવા માટે કેન્દ્ર સરકાર દ્વારા પાંચ વર્ષ પહેલાં ઘડેલા ધ બેનિંગ ઓફ અનરેગ્યુલેટેડ ડિપોઝીટ સ્કીમ્સ-2019 ( BUDS act)ના કાયદા હેઠળ સીઆઈડી ક્રાઈમે પ્રથમ કેસમાં ચાર્જશીટ કરી છે. જેમાં આરોપીઓ દ્વારા રોકાણાકારોને 600 દિવસમાં નાણાં ડબલ કરી આપવાની સાથે 0.5 ટકા વળતર દરરોજ વોલેટમાં જમા કરાવવાનું કહીને બે કંપનીમાં રોકાણ કરાવ્યુ હતુ. જયારે બીજી કેટલીક કંપનીઓ ખોલી ઠગાઇ કરી હોવાનું જણાવ્યું છે.
નોંધનીય છે કે, આ નવો કાયદો પણ જીપીઆઇડી એક્ટ જેવો છે. જીપીઆઇડી એક્ટમાં પણ પહેલો કેસ અને ચાર્જશીટ સીઆઇડી ક્રાઇમે કરી હતી. ત્યારે કાયદા હેઠળ પણ પહેલી ચાર્જશીટ સીઆઇડી ક્રાઇમે કરી છે. આ નવા કાયદા હેઠળ આરોપીને સાત વર્ષ સુધીની સજા અને એક કરોડ સુધી દંડ કરી શકાય તેવી જોવાઇ છે.
સીઆઇડી ક્રાઇમે સુનિલકુમાર રામચંદ્ર બિશ્નોઇ(રહે. ગંગાનગર રાજસ્થાન), સંતોષ કે.જકુંજયાન(રહે.પંજાબ), વિજયંત કૃષ્ણકુમાર દહીયા(રહે.પંજાબ), હૈદરઅલી અસગરઅલી બેલીમ(રહે. એપી માર્કેટ, સુરત), ઉએસ આબીદ શેખ(રહે. એપી માર્કેટ, સુરત), અબ્દુલરહેમાન મુસ્લીમ તનવર(રહે. સુરત), પોલ પિતાંબર રહેમ (રહે. સુંદરગઢ), મંથન નિલેશભાઇ ભટ્ટ( રહે.ગુરુકુળ, અમદાવાદ), સચિનસિંહ શંકર ધર્મરાજસિંગ ( રહે. ઉત્તર પ્રદેશ), પ્રવીણ રામનારાયણ દ્રિવેદી(રહે. ઉત્તર પ્રદેશ) બિસ્બદેબ બાસુદેવ માંડલ સહિતના આરોપીઓ સામે બે હજાર પાનાની ચાર્જશીટ કરી છે. જેમાં આઈપીસીની કલમ 406, 420, 411,465, 467, 468,471, 120 બી અને ધ બેનિંગ ઓફ અનરેગ્યુલેટેડ ડિપોઝીટ સ્કીમ્સ-2019(BUDS act)ની જુદી જુદી કલમ હેઠળ આરોપીઓ સામે આરોપ મુકવામાં આવ્યો છે.
ચાર્જશીટમાં પોલીસે આરોપ મુક્યો છે કે, આરોપીઓએ ફરિયાદી યોગેશચંદ્રન મનોહર નેવેને સ્ટોક એક્સચેન્જ નામના ગ્રૃપમાં 6 ડિસે. 2023ના રોજ એડ કર્યા હતા. ત્યારબાદ શેરબજારમાં રોકાણ કરવાથી ફાયદો થશે તેવી જુદી જુદી લોભામણી લાલચ ફરિયાદીને આપવામાં આવી હતી. ઉપરાંત આઇપીઓ ભરવાથી મોટો ફાયદો થશે તેમ જણાવ્યું હતું. પછી ટુકડે ટુકડે ફરિયાદી પાસે 60 લાખથી વધુનું રોકાણ કરાવી ઠગાઇ આચરી છે.
આરોપીઓ સામે ચીફ મેટ્રોકોર્ટમાં સીઆઇડી ક્રાઇમે ચાર્જશીટ કરી હતી. પરંતુ કેસ ગ્રામ્ય કોર્ટમાં લાગતો હોવાથી અને ત્યાં સ્પે. કોર્ટ હોવાથી કેસ ત્યાં ટ્રાન્સફર કરવામાં આવ્યો છે. જેથી આગામી દિવસોમાં આ કેસ ચાલવા પર આવશે.
સીઆઇડી ક્રાઇમે પહેલીવાર નવા કાયદા હેઠળ કરેલ ચાર્જશીટમાં 25 આરોપીઓને ફરાર જાહેર કરવામાં આવ્યા છે. જેમાં વેલ્સ કેપીટલ ટ્રેડના એડવાઇઝર ધનંજય સીન્હા, વેલ્સ કેપીટલ ટ્રેડની ઓળખાણ આપનાર મેરાલી ભટ્ટનાગર, વેલ સ્ટોક ડોટકોમના સંચાલક, સુષમીતા, રાહુલ રાજપુત, રાકેશ વડગામ, સંજય, સોનાલી, વિજય, વિશાખા સહિત 25 મોબાઇલ નંબરનો ઉપયોગ કરનાર લોકોને આરોપી તરીકે દર્શાવવામાં આવ્યા છે. સીઆઇડી ક્રાઇમ આગામી દિવસોમાં તેમની ધરપકડ કરે તેવી શક્યતાઓ સેવાઇ રહી છે.