રિક્ષાચાલકની સજાગતા, પોલીસની દોડધામને કારણે ૧૩ વર્ષનો ગૂમ બાળક મળી ગયો

એક મહિના પહેલાં રાજકોટ આવી ગયા બાદ ઠેર-ઠેર ભટકી રહ્યો’તો: બીમાર માતાને ઘેર મૂકી બિમાર પિતા દિવ્યાંગ ભાઈને રાજકોટ સાથે લાવી પોલીસ પાસે પહોંચ્યા

પશ્ચિમ બંગાળમાં છેલ્લા ઘણા સમયથી લોકો મજૂરીકામ માટે રાજકોટ સહિત સૌરાષ્ટ્રભરમાં આવતા હોય છે ત્યારે મહત્તમ લોકોને કામ મળી જતું હોય છે જ્યારે નથી મળતું તેઓની હાલત ખરાબ થઈ જતી હોય ન બનવાનું બની જતાં વાર નથી લાગતી. આવો જ ૧૩ વર્ષનો એક બાળક કામની શોધમાં તેના કરતા બમણી ઉંમરના મિત્ર સાથે રાજકોટ આવ્યો હતો પરંતુ મિત્રએ તેને રેઢો મુકી દેતાં ૧૩ વર્ષીય તરુણ નિરાધાર બની ગયો હતો. આ અંગેની જાણ તેના પિતાને થતાં જ તાત્કાલિક રાજકોટ દોડી આવી ક્રાઈમ બ્રાન્ચમાં જાણ કરતાં જ પોલીસે ક્ષણભરનો વિલંબ કર્યા વગર બાળકની શોધખોળ શરૂ કરી ૨૪ કલાકમાં તેની ભાળ મેળવીને પિતાને સોંપતા ખુશીનો પાર રહ્યો ન્હોતો.
આ અંગે વધુમાં જાણવા મળ્યા પ્રમાણે પશ્ચિમ બંગાળના ખરગપુર-૨માં રહેતા અને મજૂરીકામ કરતા રવિસીંગ કાલીસીંગનો ૧૩ વર્ષીય પુત્ર સચિનસિંગ તેના મિત્ર સાથે કામની શોધમાં રાજકોટ આવ્યો હતો. જો કે મિત્ર સચિનને રેઢો મુકી ક્યાંક ચાલ્યો જતાં સચિન એકલો પડી ગયો હતો. આ પછી તેણે પિતા સાથે વાત કરી `મને અહીંથી લઈ જાવ, મને ખૂબ ડર લાગે છે, હું રાજકોટ રેલવે સ્ટેશન પાસે છું’ તેવું કહ્યું હતું.
જો કે ત્યારબાદ પિતાએ સચિનનો સંપર્ક કરવા પ્રયાસ કર્યો પરંતુ સંપર્ક ન થઈ શકતાં સોમવારે દિવ્યાંગ પુત્રને લઈને રાજકોટ આવ્યા હતા. ટે્રનમાંથી ઉતર્યા બાદ એક રિક્ષાચાલકને તેણે સઘળી હકીકત જણાવતાં રિક્ષાચાલક તાત્કાલિક તેમને ક્રાઈમ બ્રાન્ચ કચેરીએ લાવ્યો હતો અને કહ્યું હતું કે અહીં ડીસીપી જગદીશ બાંગરવાને વાત કરશો એટલે તમારું કામ પૂરું થઈ જશે. ચિંતાતુર રવિસિંગ તાત્કાલિક ડીસીપી બાંગરવાને મળવા માટે પહોંચ્યા હતા જ્યાં તમામ વાત કરતાં ડીસીપીએ તુરંત જ એન્ટી હ્યુમન ટ્રાફિકિંગ યુનિટના પીઆઈ કે.કે.ગોહિલને બાળકને ગમે એટલી મહેનત કરવી પડે કરીને શોધવાનો હુકમ કરતાં ટીમ કામે લાગી ગઈ હતી.
આ પછી સચિન પાસે રહેલા મોબાઈલનું લોકેશન મેળવવા પ્રયાસ કરાયો પરંતુ ફોન બંધ હોવાથી લોકેશન મળ્યું ન્હોતું. ત્યારબાદ પોલીસે સચિન જેની સાથે આવ્યો હતો તેનો સંપર્ક કરી માહિતી એકઠી કરી સાથે સાથે સચિનનો ફોન સતત ટે્રસ ઉપર રાખતાં આખરે સફળતા મળી હતી અને તે વાંકાનેર હોવાનું ધ્યાન પર આવતાં જ તાત્કાલિક તેને ત્યાંથી રાજકોટ લાવવામાં આવ્યો હતો અને પિતાને તેની સોંપણી કરાઈ હતી. પોલીસ દ્વારા સ્વખર્ચે પરિવારને બંગાળ મોકલવા માટે ટે્રનટિકિટ સહિતની વ્યવસ્થા પણ કરવામાં આવી હતી.

રિક્ષાચાલકે ક્રાઈમ બ્રાન્ચ કચેરીએ લાવીને કહ્યું, અહીં ડીસીપીને વાત કરો એટલે તમારું કામ પતી જશે: ડીસીપીને મળતાં તુરંત જ પીઆઈને આદેશ આપ્યેો’ને શરૂ થયું `ઓપરેશન મિલાપ’