દુરદર્શનના લોગોનું ભગવાકરણ : ‘પ્રસાર ભારતી, પ્રચાર ભારતી બની ગયાનો આક્ષેપ

માત્ર લોગો જ નહી પણ સમગ્ર દેખાવમાં ફેરફાર કર્યાનો બચાવ

દૂરદર્શને તેના ઐતિહાસિક લોગોનો રંગ લાલથી બદલીને કેસરી કરી દીધો છે. DD ન્યૂઝના ઓફિશિયલ એક્સ હેન્ડલ પરથી આ સંબંધમાં એક પોસ્ટમાં કહેવામાં આવ્યું હતું કે, અમારા મૂલ્યો સમાન છે, અમે હવે નવા અવતારમાં ઉપલબ્ધ છીએ. એક એવી સમાચારની સફર માટે તૈયાર થાઓ જે પહેલાં ક્યારેય નહીં જોવા મળ્યા…. બધા નવા DD સમાચારનો અનુભવ કરો. જોકે વિપક્ષ આ ફેરફારથી નારાજ જોવા મળી રહ્યો છે.

તૃણમૂલ કોંગ્રેસના રાજ્યસભા સાંસદ અને પ્રસાર ભારતી ના ભૂતપૂર્વ CEO જવાહર સિરકરે લોગો ફેરફારની ટીકા કરી અને તેમણે ‘દૂરદર્શનનું ભગવાકરણ’ ગણાવ્યું. તેણે X પર લખ્યું, રાષ્ટ્રીય પ્રસારણકર્તા દૂરદર્શને તેનો ઐતિહાસિક ફ્લેગશિપ લોગો કેસરી રંગમાં રંગ્યો છે! તેના ભૂતપૂર્વ CEO તરીકે હું તેના ભગવાકરણને ચિંતા અને લાગણી સાથે જોઈ રહ્યો છું, તે હવે પ્રસાર ભારતી નથી રહી, તે પ્રચાર ભારતી છે.

કોંગ્રેસના મનીષ તિવારીએ આક્ષેપ કર્યો હતો કે, દૂરદર્શનના લોગોનો રંગ બદલવો એ સરકાર દ્વારા સરકારી સંસ્થાઓને કબજે કરવાનો પ્રયાસ છે.

BJPના આંધ્ર પ્રદેશના રાજ્ય ઉપાધ્યક્ષે કહ્યું, જ્યારે 1959માં દૂરદર્શન શરૂ થયું ત્યારે તેનો લોગો ભગવો હતો. સરકારે મૂળ લોગો અપનાવ્યો છે, પરંતુ લિબરલ્સ અને કોંગ્રેસ તેમની નારાજગી વ્યક્ત કરી રહ્યા છે. તેનાથી સ્પષ્ટ થાય છે કે તેને ભગવા અને હિંદુઓ પ્રત્યે નફરત છે.

આ તરફ દૂરદર્શનના પગલાનો બચાવ કરતા પ્રસાર ભારતીના CEO ગૌરવ દ્વિવેદીએ કહ્યું, નવો નારંગી રંગનો લોગો જોવા માટે આકર્ષક છે અને આ ફેરફાર દ્રશ્ય સૌંદર્ય શાસ્ત્રને ધ્યાનમાં રાખીને કરવામાં આવ્યો છે. લોગોનો રંગ કેસરી નહીં પણ નારંગી છે. તેમણે કહ્યું, ‘માત્ર લોગો જ બદલાયો નથી, પરંતુ અમે DDના સમગ્ર દેખાવને અપગ્રેડ કર્યો છે.