સસ્પેન્ડેડ કોન્સ્ટેબલ નીતા ચૌધરી અંતે જેલ હવાલે

પુછપરછમાં મોટા ખુલાસા થવાની શક્યતા

કચ્છનાં ભચાઉ નજીક કારમાં બુટલેગર સાથે ઝડપાયેલ ચર્ચિત અને સસ્પેન્ડેડ મહિલા કોન્સ્ટેબલ નીતા ચૌધરીને ગળપાદર જેલ હવાલે ધકેલાઇ છે. ગુજરાત એટીએસ દ્વારા ગઈકાલે નીતા ચૌધરીની લીંબડી નજીક બુટલેગરના સાસરીમાંથી ધરપકડ કરવામાં આવી હતી. છેલ્લા એક સપ્તાહથી નીતા ચૌધરી ફરાર હતી. જો કે, ધરપકડ બાદ નીતા ચૌધરીનો કબજો ભચાઉ પોલીસે લઈને ગળપાદર જેલ હવાલે કરી છે.

થોડા દિવસ પહેલા કચ્છના ભચાઉ નજીક એક કારમાં બુટલેગર યુવરાજસિંહ જાડેજા તથા મહિલા પોલીસ કર્મચારી નીતા ચૌધરી દારૂના જથ્થા સાથે ઝડપાયા હતા. જો કે, પોલીસને જોઈ બુટલેગરે જવાનો પર કાર ચઢાવવાનો પ્રયાસ કર્યો હતો. આ કેસમાં ક્રાઇમ બ્રાન્ચમાં મહિલા કોન્સ્ટેબલ નીતા ચૌધરીની ધરપકડ થતાં તેણીને ફરજ મોકૂફ કરવામાં આવી હતી.જો કે,કેસ ચાલી જતાં અગાઉ કોર્ટ દ્વારા નીતા ચૌધરીના જામીન મંજૂર કર્યા હતા. પરંતુ, પોલીસે સેશન્સ કોર્ટમાં અરજી કરતા બંને પક્ષોની દલીલ સાંભળ્યા બાદ કોર્ટે નીતા ચૌધરીના જામીન રદ કર્યા હતા.

કોર્ટ દ્વારા જામીન રદ્દ થઈ જશે એવી ભાળ થતા નીતા ચૌધરી ફરાર થઈ હતી. દરમિયાન, ગુજરાત એટીએસને બાતમી મળી હતી કે નીતા ચૌધરી લીંબડી નજીક બુટલેગરના સાસરીમાં છુપાઈ છે. આથી, ગુજરાત ATS ની ટીમ ઘટના સ્થળે પહોંચીને સર્ચ ઓપરેશન હાથ ધર્યું હતું અને નીતા ચૌધરીની ધરપકડ કરી હતી. ગુજરાત ATS એ નીતા ચૌધરીને કચ્છ પોલીસને સોંપી હતી.જ્યારે,આજે ભચાઉ પોલીસે નીતા ચૌધરીનો કબજો લઈને ગળપાદર જેલ હવાલે કરી હતી.