દિવાનપરાની મનાલી ટેક્સટાઈલમાં ૧૩ લાખની ચોરી કરનાર તસ્કર પકડાયો

રાજસ્થાનના બાંસવાડાથી ચોરી કરવા બે તસ્કર રાજકોટ આવ્યા’તા: મનાલી ટેક્સટાઈલની બાજુમાં જ ચણતરકામ ચાલી રહ્યું હોય તેના મારફતે દુકાનમાં ઘૂસ્યા

દસેક લાખની રોકડ લઈને ભાગેલા તસ્કરની શોધખોળ

ડીસીબીએ એક સાથે બબ્બે મોટી ચોરીના ભેદ ઉકેલી નાખ્યા હતા. ગેલેક્સી હોટેલ સામે આવેલા મારૂતિ કોમ્પલેક્સમાં ૧૦.૮૧ લાખનું સોનું-રોકડ ચોરી કરનાર જૂનાગઢના શખ્સને પકડી પાડવા ઉપરાંત તાજેતરમાં જ દિવાનપરા મેઈન રોડ ઉપર મનાલી ટેક્સટાઈલ નામની સાડીની દુકાનમાં થયેલી ૧૩ લાખની ચોરીને અંજામ આપનાર રાજસ્થાનના બાંસવાડાના કુખ્યાત તસ્કરને પકડી લેવામાં આવ્યો હતો.

ડીસીબી પીએસઆઈ વી.ડી.ડોડિયા તેમજ ટીમે નીતેશ શાંતિલાલ ખરાડી (ઉ.વ.૨૩, રહે.બાંસવાડા-રાજસ્થાન)ને ૭૮૭૦૦ની રોકડ સાથે દબોચી લીધો હતો. નીતેશની પૂછપરછમાં ખુલાસો થયો હતો કે આ ચોરી તેણે રામેશ્વર ઉર્ફે રમેશ નાથુ નીનામા સાથે મળીને કરી હતી. આ બન્ને બાંસવાડાના કુખ્યાત તસ્કર છે અને રાજકોટમાં પહેલી જ વખત ચોરી કરવા માટે આવ્યા હતા. મનાલી ટેક્સટાઈલની બાજુમાં જ એક મિલકતનું ચણતરકામ ચાલી રહ્યું હોય આ બન્ને ત્યાંથી મનાલી ટેક્સટાઈલમાં ઘૂસ્યા હતા અને અંદર રહેલી રોકડ લઈને પોબારા ભણી ગયા હતા. આ બન્ને જ્યાં ચણતરકામ ચાલી રહ્યું હોય તેની બાજુમાં જ આવેલી દુકાન કે ઓફિસને નિશાન બનાવતાં હોવાનું પણ તપાસમાં સામે આવ્યું છે.

ચોરી કર્યા બાદ તમામ રકમ રામેશ્વર ઉર્ફે નાથુ નીનામાએ રાખી લીધી હતી અને તેમાંથી એકાદ લાખ રૂપિયા નીતેશ ખરાડીને આપ્યા હતા. બાકીની રકમ રામેશ્વર ઉર્ફે રમેશ પાસે હોય તેને તાકિદે પકડવા માટે ટીમે દોડધામ યથાવત રાખી છે.