રાજકોટમાં દારૂના ત્રણ-ત્રણ પેગનું વેચાણ !
પોલીસની ધોંસને કારણે દારૂ મોંઘો બનતાં મહિલાએ નાની-નાની બોટલમાં દારૂ ભરી વેચવાનું શરૂ કર્યું છતાં પકડાઈ ગઈ
રાજકોટમાં પ્રિવેન્શન ક્રાઈમ બ્રાન્ચ (પીસીબી)એ દારૂની બદી ઉપર આક્રમક રીતે કામ લેવાનું શરૂ કરતાં જ અનેક બૂટલેગરો ભોંભીતર થઈ ગયા છે જેના કારણે પ્યાસીઓ દારૂ મેળવવા માટે આમતેમ ભટકી રહ્યા છે. બીજી બાજુ જે બૂટલેગર છાનેખૂણે ધંધો કરી રહ્યા છે તેણે ભાવ વધારી દેતાં રાજકોટમાં દારૂ મોંઘો થઈ ગયો છે જેના કારણે પ્યાસીઓ આખી બોટલની જગ્યાએ છૂટક દારૂ ખરીદવા મજબૂર બન્યા છે. આ વાતનો ફાયદો ઉઠાવી હવે બૂટલેગરોએ આખી બોટલની જગ્યાએ દારૂના ત્રણ-ત્રણ પેગ વેચવાનું શરૂ કરીને કમાણી શરૂ કરતાં જ પીસીબીએ ત્યાં પણ દરોડો પાડી દારૂ કબજે કર્યો હતો.
પીસીબીના ઈન્ચાર્જ પીઆઈ એમ.આર.ગોંડલિયા, પીએસઆઈ એમ.જે.હુણના માગદર્શન હેઠળ કોન્સટેબલ વાલજી જાડાએ માલવિયાનગર પોલીસ મથક વિસ્તારમાં આંબેડકરનગર શેરી નં.૫માં સરવૈયાના દવાખાના પાસે આવેલા મકાનમાં દરોડો પાડી દારૂ ભરેલી ૧૯ નાની-નાની બોટલ તેમજ ૬ મોટી બોટલ મળી ૨૫ બોટલ સાથે કાજલ જીતેન્દ્રભાઈ મુછડીયા (ઉ.વ.૨૭)ને પકડી પાડી હતી. કાજલના પિતા પણ જુગાર સહિતના અનેક ગુન્હામાં સંડોવાયેલા હોવાનું તપાસમાં ખુલ્યું છે.
આ ઉપરાંત કુબલિયાપરા શેરી નં.૫માં આવેલા મકાનમાંથી પીસીબીએ દેશી દારૂ બનાવવાની ભઠ્ઠી, ૭૫ લીટર દેશી દારૂ સહિતના સાથે દિવાળી જતીનભાઈ સોલંકીને પકડી પાડી હતી.
