તફડંચીનો નવો કીમિયો ! અકસ્માત કરી હોસ્પિટલે લઈ જતી વખતે ચેઈનની લૂંટ

કરણપરા પાસે અકસ્માત કર્યા બાદ લૂંટારુંઓએ જ રિક્ષા બોલાવી તેમાં ઘાયલને બેસાડ્યા’ને ત્રિકોણબાગે પહોંચ્યા કે ગળામાં પહેરેલો ૧.૦૬ લાખનો ચેઈન લૂંટી લીધો

રાજકોટમાં ચોરીના બનાવો દિવસેને દિવસે વધી રહ્યા છે. પોલીસ એકાદ-બે ગુનાનો ભેદ ઉકેલે ત્યાં એટલી જ ચોરી કે તફડંચીનો બનાવ ચોપડે નોંધાઈ જતો હોય છે. આવો જ તફડંચીનો વિચિત્ર બનાવ બન્યો છે જેમાં ત્રણ લોકોએ સ્કૂટર સાથે અકસ્માત કર્યા બાદ ચાલકને હોસ્પિટલે લઈ જતી વખતે ચેઈનની લૂંટ ચલાવતાં પોલીસમાં દોડધામ મચી જવા પામી હતી.

આ બનાવ અંગે વધુમાં જાણવા મળતી વિગતો પ્રમાણે કરણપરામાં રહેતા અને સોનાનું મજૂરીકામ કરતા સુવર્ણકાર વેણુગોપાલ શ્યામલાલભાઈ સોની (રહે.મુળ રાજસ્થાન) પોતાના પુત્ર પ્રિયાંશ તેમજ પત્ની અને મોટા પુત્ર દિવ્યાંશ સાથે અલગ-અલગ સ્કૂટર લઈને ખરીદી કરવા જઈ રહ્યા હતા. દરમિયાન કરણપરા શેરી નં.૧૩/૧૪ના ખૂણે પહોંચ્યા ત્યારે એક અજાણ્યું મોટર સાઈકલ વેણુગોપાલના સ્કૂટર સાથે અથડાતાં તે અને પુત્ર પ્રિયાંશ પડી ગયા હતા. આ વેળાએ વેણુગોપાલને પગમાં ઈજા થતાં અકસ્માત સર્જનાર ત્રિપૂટીએ રિક્ષા બોલાવી તેમને જી.ટી.શેઠ હોસ્પિટલે લઈ ગયા હતા. આ વેળાએ રિક્ષામાં તેની સાથે અકસ્માત સર્જનાર ત્રણ પૈકીની એક વ્યક્તિ પણ બેઠી હતી. જો કે ત્રિકોણબાગે પહોંચ્યા ત્યારે ટ્રાફિક વધુ હોવાથી રિક્ષા ધીમી પડી એટલે રિક્ષામાં બેઠેલા અજાણ્યા શખ્સે વેણુગોપાલે ગળામાં પહેરેલો ૧.૦૬ લાખની કિંમતના સોનાના ચેઈનની જોટ મારી રિક્ષામાંથી ઠેકડો મારીને ફરાર થઈ ગયો હતો !

ધરપકડ બાદ આરોપીએ કહ્યું, મેં કોઈ લૂંટ નથી કરી !
આ ઘટનામાં એ-ડિવિઝન પોલીસ દ્વારા કથિત લૂંટમાં સામેલ આરોપીની ધરપકડ કરી તેની પૂછપરછ કરતાં તેણે એવી કબૂલાત આપી હતી કે તેણે કોઈ પ્રકારની લૂંટ આપી નથી. અકસ્માત થયો હોવાથી વેણુગોપાલને હોસ્પિટલે લઈ જવો પડતા હોસ્પિટલનો ખર્ચ વધુ આવશે તેવા ડરને કારણે જ તે ચાલું રિક્ષાએ કૂદકો મારીને ફરાર થઈ ગયો હતો. આરોપી બંગાળનો હોવાનું પોલીસ સૂત્રો પાસેથી જાણવા મળી રહ્યું છે. હવે આ મામલે સાચું કોણ તે અંગે પોલીસે તપાસ શરૂ કરી છે.