ગ્રીનલેન્ડ ચોકડી પાસે યુવકને રિક્ષા ગેંગનો ભેટો : આઇફોન અને રોકડ સેરવી

શહેરમાં રિક્ષા ગેંગ ફરી સક્રિય બની છે. જેમાં ગ્રીનલેન્ડ ચોકડી પાસેથી યુવકને બસસ્ટેન્ડ જવા માટે બેસાડી તેંઆ ખિસ્સામાંથી એક આઈફોન અને રોકડની તફડંચી કરી રિક્ષા ગેંગ નાસી છુટતા બી ડીવીઝન પોલીસ ગુનો નોંધ્યો છે. બનાવ અંગેની વિગતો મુજબ જુનાગઢમાં વણઝારી ચોક પાસે રહેતા લાલસિંહ હેમસિંહ પઢીયાર (ઉ.26) એ નોંધાવેલ ફરિયાદમાં જણાવ્યું હતું કે તેઓ એક વર્ષથી મોબાઈલના સ્પેરપાર્ટસનો વેપાર કરે છે. ગ્રીનલેન્ડ ચોકડી પાસે રહેતા તેમના મિત્ર મહેન્દ્રસિંહને મળવા માટે રાજકોટ આવ્યા હતા. રિક્ષામાં બેસી બસ સ્ટેન્ડ જતાં હતા ત્યારે રિક્ષામાં અગાઉથી બેઠેલા એક શખસે ધકકામુકકી કરતાં ચાલકે પોતાને હવે બસ સ્ટેન્ડ જવું નથી. તેમ કહી યુવકને ઉતારી મૂક્યા હતા.બાદમાં તેઓએ તેમના ખિસ્સામાં રહેલ આઈફોન અને રોકડ ચેક કરતા મળી આવેલ ન હતા અને રિક્ષામાં બેસેલા બંને શખ્સો નાસી છુટયા હતા. જેથી રૂા.20730ની મતા રિક્ષાગેંગે ચોર્યાનું માલૂમ થતાં ફરિયાદ નોંધાવી છે.