કુવાડવા રોડ પર સંબંધીઓએ મહિલા પર હુમલો કરી આંતરડા બહાર કાઢી નાખ્યા

લગ્ન કરવા મુદ્દે ઘરમાં ઘુસી પૂર્વ જેઠના પુત્ર, જમાઈ સહિત ત્રણ શખ્સોએ છરી વડે કર્યો જીવલેણ હુમલો

શહેરના કુવાડવા રોડ પર આવેલા આવાસ ક્વાર્ટરમાં રહેતી મહિલાના ઘરમાં ઘુસી પૂર્વ જેઠના પુત્ર, જમાઈ સહિત ત્રણ શખ્સોએ છરી જીવલેણ હુમલો કરી તેના આંતરડા બહાર કાઢી નાખ્યા હતા.જેથી મહિલાને તાત્કાલિક સારવાર અર્થે સિવિલ હોસ્પિટલમાં ખસેડવામાં આવી હતી. આ મામલે પોલીસે ગુનો નોંધી હુમલાખોરોની અટકાયત કરી છે.

વિગત મુજબ કુવાડવા રોડ પર ડી માર્ટ પાછળ આવેલી શહિદ ઉધમસિંહ ટાઉનશીપમાં રહેતા રેશમાબેન યુનુસભાઈ બેલીમ (ઉ.વ.35) નામના મહિલા રાત્રીના 12:30 વાગ્યના અરસામાં પોતાના ઘરે હતા ત્યારે રામનાથપરામાં રહેતા પૂર્વ જેઠ મહેબુબના પુત્ર ટીપુ, મહેબુબના જમાઈ સોહીલ અને એક અજાણ્યા શખ્સે ઘરમાં ઘુસી છરી વડે જીવલેણ હુમલો કરી પેટ અને છાતીના ભાગે છરીના ઘા ઝીંકી દીધા હતાં. જેથી ઈજાગ્રસ્ત હાલતમાં તેણીને સારવાર માટેખસેડવામાં આવી હતી.આ અંગે રેશ્માબેનના ભત્રીજા શોએબ બોદુભાઈ સોલંકીએ બી ડિવિઝન પોલીસ મથકમાં ફરિયાદ નોંધાવતા જણાવ્યું હતું કે,તેના માસી રેશ્માબેનના લગ્ન 2005માં રામનાથપરા આરીફ સમા સાથે થયા હતા દોઢેક વર્ષ પહેલા પતિ સાથે છુટાછેડા થઈ જતાં કૌટુંબીક જેઠ મહેબુબ સમા તેની સાથે નિકાહ કરવા માંગતો હતો. પરંતુ સંતાનોને રાખવા માંગતો ન હોવાથી નિકાહ કરવાની ના પાડી દીધી હતી. જેનો ખારા રાખી મહેબુબના પુત્ર, જમાઈ સહિત ત્રણ શખ્સોએ છરી વડે હુમલો કર્યો હતો.