જુના માર્કેટ યાર્ડમાં શાકભાજીના ધંધાર્થી પર બે ભાઈઓનો હિચકારો હુમલો

શહેરના જુના માર્કેટિંગ યાર્ડમાં શાકભાજીનો ધંધો કરનાર યુવાનને બે શખસોએ વજનિયા વડે માર મારી તેનો હાથ ભાંગી નાખતા પોલીસે ગુનો નોંધી બંને શખસોની શોધખોળ કરી છે.

વિગતો મુજબ, આરટીઓ પાછળ શિવમ સોસાયટી શેરી નંબર છ માં રહેતા શાકભાજીના ધંધાર્થી વિજય મનુભાઇ ચુડાસમા (ઉ.વ 37)એ બી ડિવિઝન પોલીસ સ્ટેશનમાં નોંધાવેલી ફરિયાદમાં આરોપીમાં પરબત ઝાપડા અને છગન ઝાપડાના નામ આપતા જણાવ્યું હતું કે,તે માર્કેટિંગ યાર્ડની અંદર શાકભાજી વેચી પરિવારનું ગુજરાન ચલાવે છે. તેણે બે વર્ષ પૂર્વે પરબત ઝાપડા પાસેથી રૂપિયા 50,000 ઉછીના લીધા હતા. શરૂઆતમાં તેણે દર મહિને તેનો હપ્તો ચૂકવ્યો હતો. પરંતુ બાદમાં ધંધામાં મંદી આવી જતા આ રૂપિયા પરત આપી શક્યો ન હતો જે બાબતનો ખાર રાખી તેવો માર્કેટ યાર્ડમાં આવ્યા હતા.અને પૈસાની ઉઘરાણી કરી ઝગડો કરી લોખંડના વજનિયા વડે માર માર્યો હતો.જેથી આ મામલે પોલીસે ગુનો નોંધી કાર્યવાહી કરી છે.