- માધાપર ચોકડીએ રહેતો યુવક નોકરીએ જતો હતો ત્યારે અકસ્માતમાં કાળનો કોળિયો બન્યો
વોઇસ ઓફ ડે રાજકોટ
રાજકોટમાં હિટ એન્ડ રનની વધુ એક ઘટના બની છે. ગોડલ રોડ કોઠારીયા સોલવન્ટ નજીક ગઇકાલ સવારે ટેન્કરે બાઈકને ઠોકર મારતા બાઈક ચાલક યુવાન રોડ પર ફેંકાઇ ગયા બાદ તેના માથા પર ટેન્કરના વ્હીલ ફરી વળતા તેનું ઘટના સ્થળે જ કમકમાટી ભર્યું મોત થયું હતું જ્યારે અકસ્માત સર્જી ટેન્કર ચાલક ટેન્કર મૂકી ભાગી ગયો હતો.
વિગત મુજબ માધાપર ચોકડીએ મનમોહન મારબલવાળી શેરીમાં રહેતા ભાસ્કરભાઈ નાથાલાલ મુગરા (ઉ.વ.૪૧) નામનો યુવક ગઇકાલ સવારે શાપર તરફના રસ્તે નોકરી પર જઈ રહ્યો હતો. ત્યારે ગોડલ રોડ નુરાનીપરાના ગેઇટ નજીક પહોંચતા તેના બાઇકને ટેન્કરના ચાલકે ઠોકરે ચડાવતા બાઇક ચાલક યુવાન રોડ પર ફેંકાઇ ગયા બાદ તેના માથા પર ટેન્કરના વ્હીલ ફરી વળતાં તેનું ઘટના સ્થળે જ કમકમાટીભર્યું મોત થયું હતું. તેણે પહેરેલા હેલ્મેટનો પણ બૂકડો બોલી ગયો હતો. બનાવને પગલે લોકોના ટોળા ભેગા થઇ ગયા હતા અને ટ્રાફિક જામ થઈ ગયો હતો.જ્યારે ટેન્કર ચાલક ટેન્કર મૂકી નાસી ગયો હતો. બનાવની જાણ થતા આજીડેમ પોલીસ મથકના હરપાલસિંહ સહિતનો સ્ટાફ દોડી આવ્યો હતો. અને મૃતક યુવાન પાસેથી મળેલા આધારકાર્ડ અને મોબાઇલ ફોનને આધારે પોલીસે તપાસ શરુ કરી તેના પરિવારને જાણ કર્યા બાદ મૃતદેહને પીએમ માટે હોસ્પિટલે ખસેડ્યો હતો.
