ટંકારાના લજાઈમાં નકલી ઓઇલની ફેક્ટરી ઝડપાઇ

સ્ટેટ મોનીટરીંગ સેલની ટીમે જાણીતી બ્રાન્ડનું ડુપ્લીકેટ પેકેજીંગ કરતા બે આરોપીઓને પકડી પાડયા

મોરબી : મોરબી જિલ્લામાં નકલી ટોલનાકું, નકલી દારૂ પક્ડાયાની ઘટના બાદ સ્ટેટ મોનીટરીંગ સેલની ટીમે ટંકારા તાલુકાના લજાઈ ગામની સીમમાં દરોડો પાડી ભારત પેટ્રોલિયમ, ઇન્ડિયન ઓઇલ, સર્વો અને હીરો સહિતની જાણીતી ઓઇલ કંપનીઓના નામનો ઉપયોગ કરી નકલી એન્જીન ઓઇલ પેકીંગ કરતી ફેક્ટરી ઝડપી લઈ રૂપિયા 17 લાખની કિંમતનું 21,488 લીટર ઓઇલ સહિત રૂપિયા 23,17,040 મુદામાલ સાથે બે આરોપીઓને ઝડપી લેતા સનસનાટી મચી જવા પામી છે.

સ્ટેટ મોનીટરીંગ સેલની ટીમે ટંકારા પોલીસને અંધારામાં રાખી ટંકારા તાલુકાના લજાઈ ગામની સીમમાં આવેલ મારુતિ ઇન્ડસ્ટ્રીયલ એરિયામાં જાણીતી કંપનીઓનું નકલી ઓઇલ પેકીંગ કરવામાં આવતું હોવાની બાતમીને આધારે દરોડો પાડી નકલી ઓઇલ એન્જીન પેકેજીંગ કરવાનું તોસ્તાન કારસ્તાન ઝડપી લીધું હતું. એસએમસી ટીમે બનાવ સ્થળેથી આરોપી  મેહુલ નરેન્દ્રભાઈ ઠક્કર રહે.ગોકુલધામ સોસાયટી મોરબી અને આરોપી અરુણ ગણેશભાઈ કુંડારીયા રહે.મોરબી રવાપર રોડ વાળાને ઝડપી લઇ ભારત પેટ્રોલિયમ, ઇન્ડિયન ઓઇલ, સર્વો, સેલ અને હીરો સહિતની અનેક જાણીતી કંપનીના નકલી ઓઇલ પેકીંગ કરવા માટે ઉપયોગમાં લેવાતા અલગ અલગ માપના પ્લાસ્ટિકના ડબ્બા તેમજ અન્ય મોટા પેકીંગ પણ એસએમસીએ કબ્જે કરી રૂપિયા 17 લાખની કિંમતનું 21,488 લીટર ઓઇલ સહિત 23,17,040નો મુદામાલ કબ્જે કર્યો હતો.

વધુમાં સ્ટેટ મોનીટરીંગ સેલની ટીમે સવારથી પાડેલ દરોડાની કાર્યવાહી સાંજ સુધી ચાલી હતી જેમાં એસએમસીએ આરોપીઓના કબજા વાળા ગોડાઉનમાંથી 21,488 લીટર ઓઇલ, નકલી ઓઈલના પેકીંગ ઉપર સ્ટીકર લગાવવા માટેના મશીન, મોટર, બેલ્ટ મશીન, ઇલેક્ટ્રોનિક્સ વજનકાંટો, સીલિંગ મશીન, ઓઇલ ભરવા માટેનું મશીન, બેરલ, એક 5 લાખની કિંમતની કાર, બે મોબાઈલ ફોન તેમજ રૂપિયા 5200 રોકડા તેમજ અલગ અલગ પેકીંગમાં નકલી ઓઇલ ભરવા માટેના પ્લાસ્ટિકના કેન સહિત કુલ રૂપિયા 23,17,040નો મુદામાલ કબ્જે કરી બન્ને આરોપીઓ વિરુદ્ધ ટંકારા પોલીસ મથકમાં ફરિયાદ નોંધાવવામાં આવી હતી.

આરોપીઓ તમામ જાણતી બ્રાન્ડનું ડુપ્લીકેટ ઓઇલ પેકીંગ કરતા

સ્ટેટ મોનીટરીંગ સેલની ટીમે મોરબીના બે ભેજાબાજ આરોપીઓ દ્વારા શરૂ કરાયેલ નકલી એન્જીન ઓઇલ પેકીંગ કરવાના કારખાનામાંથી ભારત પેટ્રોલિયનું મેક બ્રાન્ડ, ઇન્ડિયન ઓઇલ કંપનીનું સર્વો સુપર, ગલ્ફ કંપનીનું સીએનજી સુપ્રીમ અને હીરો, સેલ સહિતની જાણીતી ઓઇલ કંપનીના નકલી ઓઈલના પેકીંગ હતા. સાથે જ ચતુર આરોપીઓ દ્વારા અડધો લીટરથી લઈ1 લીટર, 5 લીટર અને 20 લીટર તેમજ 40 લિટરના નકલી એન્જીન ઓઇલ પેકીંગ કરવામાં આવતું હોવાનું પણ બહાર આવ્યું છે.