પોરબંદરનાં દરિયામાંથી ૪૮૦ કરોડ રૂા.નું ડ્રગ પકડાયું
છ પાકિસ્તાની નાગરિકની ધરપકડ: પાકિસ્તાનથી ગુજરાતના કાંઠે આવતી ડ્રગની વધુ એક ખેપ પકડાઇ:NCB, ATS અને કોસ્ટગાર્ડનું સફળ ઓપરેશન
ગુજરાતના અને ખાસ કરીને સૌરાષ્ટ્રનાં પોરબંદરના દરિયામાંથી હમણાં હમણાં બે વખત ડ્રગનો જંગી જથ્થો પકડાયા પછી પણ ડ્રગ લાવનારાની હિમત ઓછી થઇ નથી અને આવી પ્રવૃત્તિ નિરંતર ચાલી રહી છે. આ વાતના પુરાવા રૂપે નાર્કોટિક કંટ્રોલ બ્યુરો, કોસ્ટગાર્ડ અને એ.ટીએસ.ના અધિકારીઓએ ગઈ મોડી રાત્રે પોરબંદરના દરિયામાં કાંઠેથી કેટલાક નોટીકલ માઈલ દુર એક બોટ પકડી હતી અને તેમાંથી ૪૮૦ કરોડનું ડ્રગ જપ્ત કર્યું હતું. આ બોટમાં સવાર છ પાકિસ્તાની નાગરિકોની ધરપકડ કરવામાં આવી છે.
સુત્રોના જણાવ્યા અનુસાર, આ બોટ દ્વારા ગુજરાતના કાંઠે લાવવામાં આવી રહેલું ડ્રગ દક્ષિણ પૂર્વ એશિયાના દેશો તરફ મોકલવાનું હતુ અને આ જથ્થો ભારતમાં ઘુસાડવા માટે ગુજરાતનો કાંઠો પસંદ કરવામાં આવ્યો હતો. ગુજરાતના દરિયામાંથી વારંવાર ડ્રગ પકડાતું હોવાથી જુદી જુદી એજન્સીઓ એલર્ટ મોડ ઉપર જ રહે છે. મોડી રાત્રે પેટ્રોલિગ દરમિયાન એક શંકાસ્પદ બોટ દેખાતા તેને રોકવામાં આવી હતી અને તલાશી દરમિયાન આ જથ્થો મળી આવ્યો હતો.
વેરાવળમાં થોડા દિવસ પહેલા રૂપિયા ૩૫૦ કરોડનું ડ્રગ્સ જપ્ત કરવામાં આવ્યું હતું. અને ત્યાર બાદ પોરબંદર પાસેના દરિયામાથી રૂપિયા એક હજાર કરોડથી વધારેની કિમતના હસીસ સહિત ત્રણ અલગ અલગ ડ્રગ્સને જપ્ત કરવામાં સફળતા મળી હતી.
૨૦૨૦-૨૧થી ૨૦૨૨-૨૩ દરમિયાન રાજ્યમાં ડ્રગ્સનો કુલ ૬૦ હજાર કિલો જથ્થો ઝડપાયો હતો, જેની કિમત ૨૧ હજાર કરોડ રૂપિયાથી વધુ હતી. જપ્ત કરાયેલા જથ્થામાં સૌથી વધુ ૧૫ હજાર કરોડનું એમડી. ડ્રગ્સ ઝડપી પાડવામાં આવ્યું છે. આ ઉપરાંત પોષડોડા, કોકેઇન, અફીણ, બ્રાઉન સુગર વગેરે કેફી પદાર્થો પણ મળી આવ્યા છે. તેમ જ ૧૩૦૦ લિટર એમડી ડ્રગ્સ લિક્વિડ ફોર્મમાં પણ પકડાયું હતું. સરકાર દ્વારા અનેક પગલાં ભરવા છતાં રાજ્યમાં ડ્રગ્સ પકડાવાનું અટક્યું નથી અને ૨૦૨૪માં પણ આ સિલસિલો ચાલુ રહ્યો છે.
