ઓનલાઇન ગેમિંગ એપમાં પૈસા હારી જતાં કોલેજિયન યુવકનો આપઘાત
નાગેશ્વર જૈન દેરાસર પાસે ફ્લેટમાં ગળેફાંસો ખાઇ જીવન ટૂંકાવ્યું : મોબાઇલમાં સ્યૂસાઇડ નોટ મળી આવી
રાજકોટમાં નાગેશ્વર જૈન દેરાસર પાસે ફ્લેટમાં રહેતા અને કોલેજમાં અભ્યાસ કરતાં 20 વર્ષીય કોલેજિયન યુવકે ઓનલાઇન ગેમિંગ એપમાં પૈસા હારી જતાં મોબાઇલમાંથી સ્યૂસાઇડ નોટ લખી ગળેફાંસો ખાઈ આપઘાત કરી લેતા પરિવારમાં અરેરાટી મચી જવા પામી છે. આ મામલે ગાંધીગ્રામ પોલીસે વધુ તપાસ શરૂ કરી છે.
વધુ વિગતો મુજબ જામનગર રોડ પર આવેલા નાગેશ્વર સોસાયટીના વર્ધમાન એપાર્ટમેન્ટ પાસે રહેતા ક્રિષ્ના રમાકાંત પંડીત નામના 20 વર્ષીય યુવાને ગઇકાલે બપોરના સમયે પોતાના ઘરે ગળેફાંસો ખાઇ આપઘાત કરી લીધો હતો. આ સમયે તેમના પરીવારજનો ક્રિષ્નાના રૂમમાં પ્રવેશી બોલાવવા જતા ક્રિષ્ના લટકતી હાલતમાં જોવા મળ્યો હતો. બનાવની જાણ ગાંધીગ્રામ પોલીસને થતાં સ્ટાફ ઘટના સ્થળે પહોંચી ગયો હતો અને કાગળો કરી ક્રિષ્ના પંડીતનો મૃતદેહ પીએમ માટે સિવિલ હોસ્પિટલે ખસેડવામાં આવ્યો હતો. તપાસમાં જાણવા મળ્યું હતું કે,મૃતક ક્રિષ્ના એક ભાઇ અને એક બહેનમાં મોટો હતો અને કોલેજના પ્રથમ વર્ષમાં અભ્યાસ કરતો હતો.અને તેના પિતા રાજકોટ-અમદાવાદ હાઇવે પર આવેલી ખાનગી કંપનીમાં નોકરી કરે છે. તેમના પિતા કામ પર ગયા હતા અને માતા તેમજ બહેન બજારમાં ગયા હતા.તે સમયે તેને આ પગલું ભરી લીધું હતું.
મૃતક ક્રિષ્નાના મોબાઇલમાંથી એક સ્યુસાઇડ નોટ મળી આવી હતી જેમાં પોતે ઓનલાઇન ચાલી રહેલી ગેમીંગ એપમાં સટ્ટો રમતો હતો અને તેમાં મોટી રકમ હારી જતા કોઇને મોં દેખાડવાને લાયક ન રહેતા પોતે આ પગલુ ભરતો હોવાની પરિવારને સંબોધીને લખ્યુ હતુ.
