અઢી વર્ષમાં રાજકોટની ૧૧ સોસાયટીમાં ૧ કરોડની ચોરી કરનાર બેલડી પકડાઈ

પત્રકાર, શ્રેયસ, સાંઈનગર, ત્રિવેણી, શારદાનગર સહિતની સોસાયટીમાં હાથફેરો કરનાર બે નેપાળી શખ્સો ક્રાઈમ બ્રાન્ચના હાથે દબોચાયા: ચોરીનો તમામ માલ નેપાળ ભેગો કરી દીધો !

રાજકોટમાં ચોરટાંઓનો આતંક વધી રહ્યો છે જેને ડામી દેવા માટે પોલીસ ચારે બાજુ દોડધામ કરી રહી છે. બીજી બાજુ વર્ષો પહેલાં ચોરી કરનારી ગેંગને પણ દબોચી લેવાના પ્રયાસો વચ્ચે ક્રાઈમ બ્રાન્ચને એક મોટી સફળતા સાંપડી છે. અઢી વર્ષની અંદર રાજકોટની ૧૧ સોસાયટીમાં ૧ કરોડથી વધુની માલમત્તાની ચોરી કરનાર નેપાળી બેલડીને પકડી પાડીને ૧૨ ચોરીના ભેદ ઉકેલી નાખવામાં આવ્યા છે. જો કે પકડાયેલા તસ્કરોએ ચોરીનો તમામ માલ નેપાળ ભેગો કરી દીધો હોવાનું ખુલ્યું છે.

ક્રાઈમ બ્રાન્ચ પીઆઈ એમ.આર.ગોંડલીયા, પીએસઆઈ એમ.જે.હુણ સહિતની ટીમ દ્વારા કોઠારિયા મેઈન રોડ પર તીરૂપતિ સોસાયટી, પાણીના ટાંકા પાસેથી પ્રવીણ બસંત શાહી (ઉ.વ.૩૫, રહે.હુડકો ચોકડી, મુળ નેપાળ) અને ભરત રણબહાદુર શાહી (ઉ.વ.૨૩, રહે.હુડકો ચોકડી, મુળ નેપાળ)ને પકડી પાડી તેના કબજામાંથી ૧૨૩૦૦ની રોકડ, ડીસમીસ, વાંદરીપાનુ, ફોન સહિતનો મુદ્દામાલ કબજે કરવામાં આવ્યો છે.

આ બેલડી ૨૦૨૧થી રાજકોટમાં ચોરી કરવા આવી રહી છે અને જેવી ચોરી થઈ જાય એટલે નેપાળ ભાગી જતી હતી અને ત્યાંથી થોડા સમય બાદ ફરી રાજકોટ આવીને ચોરીને અંજામ આપી રહી હતી. આ રીતે તેણે શહેરની અલગ-અલગ ૧૧ સોસાયટી જેમાં પત્રકાર, શ્રેયસ, સાંઈનગર, ત્રિવેણી, શારદાનગર સહિતની સોસાયટીમાં હાથફેરો કરીને એકાદ કરોડથી વધુની ચોરી કરી હોવાનું ખુલવા પામ્યું છે. આ બન્ને અહીં અન્ય નેપાળી લોકો સાથે રહે છે અને અલગ-અલગ સોસાયટી તેમજ એપાર્ટમેન્ટના ચોકીદાર અથવા તો વાહન ધોવાનું કામ કરતા નેપાળી લોકો પાસેથી બંધ મકાનની માહિતી મેળવી રેકી કરતા હતા. આ પછી હથિયારો સાથે રેકી કરાયેલા ઘરમાં ત્રાટકીને ચોરી કરી રફુચક્કર થઈ જતા હતા.

આટલી ચોરીનો ભેદ ખુલ્યો
પત્રકાર સોસાયટી, બીગબજાર પાછળ, સાંઈનગર સોસાયટી, એરપોર્ટ ફાસ નજીક શ્રેયસ સોસાયટી, વૈશાલીનગરમાં એક મકાન, મહિલા કોલેજ અન્ડર બ્રિજ પાસે ગુજરાત હાઉસિંગ બોર્ડ કોલોની, સાધુ વાસવાણી રોડ પર ત્રિવેણી સોસાયટી, આકાશવાણી ચોક પાસે શારદાનગર સોસાયટી, બીગબજાર પાછળ સાંઈનગર સોસાયટી, રૈયા ટેલિફોન એક્સચેન્જ મમ્બાસા પાર્કમાં એક મકાન, યુનિવર્સિટી રોડ પર જલારામ-૨માં એક મકાન, ૧૫૦ ફૂટ રિંગરોડ પર મોન્ટાબેલા એપાર્ટમેન્ટનો ફ્લેટ, મોરબીના સનાળા રોડ પર આવેલું એક મકાન.

રાજકોટમાં ચોરી કરવા આવ્યા’ને મળ્યા ૧૦૦૦; સાથે પકડાઈ પણ ગયા
ક્રાઈમ બ્રાન્ચના સૂત્રોએ જણાવ્યું કે નેપાળી બેલડી રાજકોટમાં ફરી ચોરી કરવા આવી હતી અને એક જગ્યાએ ચોરી કરી પણ હતી પરંતુ ત્યાંથી તેને માત્ર ૧૦૦૦ રૂપિયા જ મળ્યા હતા પરંતુ પોલીસ માટે સૌથી મોટી સફળતા એ છે કે આખરે આ બેલડી પકડાઈ ચૂકી છે.