ગુજરાતમાં હાઈ-ઍલર્ટ: CMO, AMC અને RSS કચેરીને બોમ્બથી ઉડાવી દેવાની ધમકી, પોલીસ-બોમ્બ સ્કવોડ દોડતી થઈ
ગાંધીનગર અને અમદાવાદમાં 10મી જૂનથી 30મી સપ્ટેમ્બર દરમિયાન બોમ્બ બ્લાસ્ટની ધમકીભર્યા ઈમેલ મળતાં જ સુરક્ષા એજન્સીઓ દોડતી થઈ ગઈ છે. અલગ-અલગ ઈમેલ આઈડી પરથી મોકલાયેલા આ મેઈલમાં સ્પષ્ટ સમય સાથે ધમકી આપવામાં આવી છે કે મુખ્યમંત્રી કાર્યાલયને બપોરે 1.11 વાગ્યે, અમદાવાદ મ્યુનિસિપલ કોર્પોરેશનની દાણાપીઠ સ્થિત ઓફિસને બપોરે 3.11 વાગ્યે અને રાષ્ટ્રીય સ્વયંસેવક સંઘની કચેરીને સાંજે 5.11 વાગ્યે બોમ્બથી ઉડાવી દેવાશે. ધમકીની ગંભીરતા જોતાં AMCની મુખ્ય ઓફિસ તાત્કાલિક ખાલી કરાવી દેવાઈ અને પોલીસ, બોમ્બ ડિસ્પોઝલ સ્કવોડ તથા ડોગ સ્કવોડે તપાસ શરૂ કરી. શહેરના તમામ સંવેદનશીલ અને જાહેર સ્થળોએ હાઈ-ઍલર્ટ જાહેર કરી સુરક્ષા વધારી દેવામાં આવી છે અને કડક ચેકિંગ હાથ ધરાયું છે. ઉચ્ચ પોલીસ અધિકારીઓ સાથે સાયબર ક્રાઈમની સ્પેશિયલ ટીમ એક્શનમાં આવી છે અને ધમકીભર્યા ઈમેલના સોર્સ તથા IP એડ્રેસ ટ્રેસ કરવા ટેકનિકલ સર્વેલન્સની મદદ લેવાઈ રહી છે.
