કેન્દ્રીય બજેટમાં મ્યુનિસિપલ બોન્ડ જાહેર થશે? નાણામંત્રી દ્વારા બજેટ પહેલા મૂડી બજારના પ્રતિનિધિઓ સાથે કરી બેઠક
કેન્દ્રીય નાણાં પ્રધાન નિર્મલા સીતારમણે બજેટ પહેલાની મુખ્ય બેઠકો શરૂ કરી છે. મંગળવારે મૂડી બજારના પ્રતિનિધિઓ અને નાણાં પ્રધાન નિર્મલા સીતારમણ વચ્ચે એક મહત્વપૂર્ણ બેઠક યોજાઈ હતી, જેમાં બજાર સંબંધિત અનેક મુદ્દાઓ પર ચર્ચા કરવામાં આવી હતી. બેઠક દરમિયાન, પ્રતિનિધિઓએ એવા સૂચનો કર્યા હતા જે રોકાણના વાતાવરણમાં સુધારો કરવા અને બજારને મજબૂત બનાવવા માટે માનવામાં આવે છે. ખાસ કરીને મ્યુનિસિપલ બોન્ડ જારી કરવા માટે ભાર મુકાયો હતો અને નિર્મલાએ તે માટે ઘટતું કરવાની ખાતરી આપી હતી.
સૂત્રો પાસેથી મળેલી વિશિષ્ટ માહિતી અનુસાર, બેઠકમાં ડેરિવેટિવ્ઝની તુલનામાં રોકડ પર સ્પેશિયલ ટેક્સ ઘટાડવાની ભલામણ કરવામાં આવી હતી. પ્રતિનિધિઓએ રોકડ સેગમેન્ટમાં રોકાણકારોની વધુ ભાગીદારીને પ્રોત્સાહન આપવા માટે રોકડ બજાર પર ઘટાડવાની ભલામણ કરી હતી.
આ ઉપરાંત, ઇક્વિટીમાં ઘરગથ્થુ બચત વધારવા પર ચર્ચા કરવામાં આવી હતી. બેઠકમાં બાયબેક પર ફક્ત નફા પર કર લાદવાની પણ ભલામણ કરવામાં આવી હતી. બાયબેક માળખાને સરળ બનાવવાથી કંપનીઓ માટે પ્રક્રિયા વધુ સ્પષ્ટ થઈ શકે છે.
એવું પણ સૂચન કરવામાં આવ્યું હતું કે મ્યુનિસિપલ બોન્ડ જારી કરવા પર વિચાર કરવામાં આવે, જે સ્થાનિક સંસ્થાઓને ભંડોળ એકત્ર કરવામાં મદદ કરી શકે છે. આ બધા સૂચનો નાણા પ્રધાનને જણાવવામાં આવ્યા હતા અને બેઠકમાં તમામ મુદ્દાઓ ઔપચારિક રીતે રજૂ કરવામાં આવ્યા હતા. નાણામંત્રીએ આ બધા સૂચનો સાંભળીને ઘટતું કરવા ખાતરી આપી હતી.
