VIDEO : રાજકોટના ખેતલા આપા મંદિરમાં વનવિભાગનો દરોડો,મંદિરનો મહંત જથ્થાબંધ આંધળી ચાકળ સાથે પકડાયો
આજના આધુનિક યુગમાં પણ અંધશ્રદ્ધામાં ગળાડૂબ લોકો જૂની ચલણી નોટો, ઘૂવડ, કાચબા અને આંધળી ચાકળ જેવા જીવોનો તાંત્રિકવિધિ માટે ઉપયોગ કરતા હોય છે અને આવી જ તાંત્રિક વિધિના ઉપયોગમાં આવતી વસ્તુઓ ખરીદ-વેચાણનું પણ જબરું માર્કેટ છે ત્યારે રાજકોટના સામાજિક વનીકરણ વિભાગ દ્વારા ચોક્કસ બાતમીના આધારે રાજકોટની ભાગોળે જૂના માર્કેટિંગ યાર્ડથી ગ્રીનલેન્ડ ચોકડી તરફ જતા રસ્તે આવેલા ખેતલા આપાના મંદિરે દરોડો પાડી નર અને માદા આંધળી ચાકળ તેમજ તેના થોકબંધ બચ્ચાઓ સહિત કુલ બાવન જીવ સાથે મંદિરના મહંતને ઝડપી લઈ ભારતીય વન્ય પ્રાણી સંરક્ષણની કલમો હેઠળ કાર્યવાહી કરી હતી.
રેન્જ ફોરેસ્ટ ઓફિસર રાજકોટ (ઉત્તર)ના વિક્રમસિંહ આર. પરમાર, રેન્જ ફોરેસ્ટ ઓફિસર રાજકોટ (દક્ષિણ) તેમજ વાઈલ્ડ લાઈફ વોર્ડન એચ.બી.મોકરિયા સહિતની વન વિભાગની ટીમને બાતમી મળી હતી કે ઉપરોક્ત મંદિરનો મહંત મનુભાઈ મણીરામ દૂધરેજીયા કે જે મંદિરમાં પૂજા કરે છે તેણે મંદિરની અંદર શુપ્ત કોમન સેન્ડ બોયા (આંધળી ચાકળ)ન બાવન નાના-મોટા જીવને `કેદ’ કરીને રાખ્યા છે.
ટીમે મંદિરમાં દરોડો પાડી તપાસ કરતાં અંદરથી આંધળી ચાકળનો મોટો જથ્થો મળી આવતા મહંત મનુ મણીરામ દુધરેજીયાની ધરપકડ કરવામાં આવી હતી અને તેના પાસે આટલી સંખ્યામાં આંધળી ચાકળ ક્યાંથી આવી તે સહિતના મુદ્દે પૂછપરછ શરૂ કરાઈ હતી. પ્રારંભિક તપાસમાં ખુલ્યા પ્રમાણે મહંત દ્વારા આ આંધળી ચાકળનો ઉપયોગ અંધશ્રદ્ધા માટે કરવામાં આવી રહ્યો હતો અને તે ઘણા લાંબા સમયથી ચાકળને કેદ કરીને બેઠો હતો.
