જંગલના અધિકારીની જંગલિયત! પત્ની-સંતાનોની હત્યા પૂર્વે જ મોતનો ખાડો ખોદાવ્યો,વાંચો ફિલ્મોની મર્ડર મિસ્ટ્રીને પણ ઝાંખી પાડે તેવી ઘટના
ભાવનગર ફોરેસ્ટ ડિપાર્ટમેન્ટના એસીએફ શૈલેષ બચુભાઈ ખાંભલાએ જંગલના જાનવરો પણ ન આચરે એવી જંગલિયત કરીને પત્ની, બે માસૂમ બાળકોની ઠંડા કલેજે હત્યા કરી નાખ્યા બાદ જાતે જ ત્રણેયના મૃતદેહને પોતાના જ સરકારી નિવાસ પાસે ખોદાવેલા ઉંડા ખાડામાં દાટી દીધા હતા. ભાવનગર એલસીબીની ટીમે દૃશ્યમ ફિલ્મ કે આવી હિન્દી ફિલ્મોની મર્ડર મિસ્ટ્રીને પણ ટક્કરમારે તેવા કોલ્ડ બ્લડેડ ત્રિપલ મર્ડરની હચમચાવનારી ઘટના પરથી પર્દાફાશ કર્યો છે. આરોપી વન અધિકારી પતિની ધરપકડ કરી રિમાન્ડ મેળવવા તજવીજ હાથ ધરી છે. ભાવનગર ફોરેસ્ટ રેન્જના એસીએફ શૈલેષ બચુભાઈ ખાંભલાના માતા-પિતા પરિવાર સુરત રહે છે. શૈલેષની પત્ની નયના (ઉ.વ.39), પુત્રી પૃથા (ઉ.વ.13) તથા પુત્ર ભવ્ય (ઉ.વ.9) ત્રણેય પણ સુરત પરિવાર સાથે રહેતા હતા. શૈલેષ ભાવનગરમાં એકલો તળાજા રોડ પરના વન વિભાગના આવાસ ક્વાર્ટરમાં રહે. દિવાળીના વેકેશનમાં ગત તા.27ના રોજ પત્ની નયના બન્ને સંતાનો સાથે અહીં ભાવનગર પતિ પાસે રહેવા આવે છે. શૈલેષના દિમાગમાં કંઈક અલગ જ પ્લાન હશે અથવા એકલું રહેવું હોય તેમ સપ્તાહ બાદ પત્ની સંતાનોને પરત સુરત મોકલવા કે જતા રહેવા ગોઠવણ કરી ગત તા.5ના રોજ ત્રણેયને સુરત જવા નક્કી કરાયું. જો કે પત્ની ભાવનગર રહેવા માંગતી હતી અને અગાઉ પણ તેણે પતિને હવે સાથે રાખવા વાત કરી હતી અને બન્ને વચ્ચે આ બાબતે તું તું-મેં મેં થતી હતી.
કોલ્ડ બ્લડેડ ત્રિપલ મર્ડરનો સમગ્ર ઘટનાક્રમ
- તા.27-10ના નયના બે બાળકો સાથે પતિ પાસે દિવાળી વેકેશનમાં આવે છે
- તા.2-11ના શૈલેષે ક્વાર્ટર પાછળ જ ઉંડો ખાડો ખોદાવ્યો
- તા.5-11ના પત્નીએ પરત જવાની ના કહેતા અને એ પૂર્વે પણ દંપતી વચ્ચે સાથે રહેવા મુદ્દે કંકાસ
- પ્રથમ પત્નીની ત્યારબાદ બન્ને બાળકોની હત્યા કરી
- હત્યા બાદ તા.5ના જ લાશ ખાડામાં નાખી ખાડો બુરાવ્યો
- તા.7ના શૈલેષે પત્ની, બે બાળકો ગૂમની જાહેરાત પોલીસ મથકમાં કરી
- સીસીટીવી, અન્યોના સ્ટેટમેન્ટમાં પોલીસને ગૂમ અંગે કોઈ ઠોંસ માહિતી ન મળી, પોલીસને ગૂમરાહ કરાઇ
- પરિવાર, અગ્રણીઓની રજૂઆત બાદ એસપી પાંડેએ તપાસ એલસીબીને સોંપી
- એલસીબી પીઆઈ એ.આર.વાળા, પીએસઆઈ પી.ડી. ઝાલાએ હાથ લીધી તપાસ
- નયનાનો મોબાઈલ ફોન એરપ્લેન મોડમાં અને અંદર રહેલો મેસેજ કે બીજા જોડે રહેવા જાય છે, પોલીસે મેસેજ સાથે અન્ય મેસેજ ચેકકરતાં મેસેજ ફ્રોડ હતો.
- વન વિભાગના અધિકારીઓ, સ્ટાફની ખાડો ગાળ્યા અંગેની પૂછતાછ સાથે વિગતો મેળવી
- ખાડો ખોદતા ત્રણેય ડેડબોડી
મળી અને તા.15-11ના રોજ ઉકેલાયો ભેદ - ત્રિપલ મર્ડર બનાવમાં પોલીસ જાતે જ સરકાર પક્ષે ફરિયાદી બની, શૈલેષની ધરપકડ કરવામાં આવી
ભાવનગર આવેલા પત્ની, બે બાળકોને પતાવી દેવા જાણે પ્રિ-પ્લાન બનાવ્યો
ભાવનગર આવેલા પત્ની બે બાળકો સાથે રહ્યા બાદ જાણે ચારેક દિવસમાં જ જંગલી જેવા બનેલા જંગલના અધિકારીએ કાંઈક એવું બન્યું કે ત્રણેયની હત્યા કરી દેવા માટે પ્રિ-પ્લાન જ બનાવ્યો હતો. પત્ની બન્ને બાળકો તા.5-11ને બુધવારના સુરત જવાના હતા અને ત્રણેયને જીવતા જ ન જવા દેવા હોય તેમ તા.2ના રોજ જ ફરેબી (દગાખોર) ફોરેસ્ટ ઓફિસરે મર્ડર મિસ્ટ્રીને અંજામ આપવા માટે પોતાના આવાસની પાછળના ભાગે જ કમ્પાઉન્ડમાં સ્ટાફને કહીને છ ફૂટથી વધુ ઉંડો અને પાંચ ફૂટથી વધુ પહોળો ખાડો ખોદાવ્યો હતો.
સ્ટાફને પણ ગેરમાર્ગે દોર્યો, પાણી અને કચરાના નિકાલનું કહી મોતનો ખાડો ખોદાવ્યો
જંગલિયત, હેવાનિયત કે સેતાનીયત જે શબ્દો કહીએ એ ટૂંકા પડે જેવા શૈલેષે સ્ટાફને પણ ગંધ ન આવે તેમ ગેરમાર્ગે દોર્યો, મોતનો ખાડો ખોદાવવા તાબાના અધિકારીને એવી સૂચના આપી કે પાણીનો અને કચરાનો નિકાલ કરવા માટે મોટો ખાડો ખોદવો છે કહી સ્ટાફ પાસે જ મોતનો ખાડો ખોદાવ્યો હતો. ભાવનગર રોકાવા આવેલી પત્ની પરત સાસરે જવા માગતી ન હતી, અહીં પતિ સાથે જ રહેવા માગતી હતી. પતિ શૈલેષે સુરત જવા કહ્યું, છેલ્લા થોડા વખતથી દંપતી વચ્ચે સાથે રહેવા બાબતે કંકાસ ચાલતો હતો.
તા.5ની વહેલી સવારે નયના અને તેના બે બાળકો માટે મોતની સવાર બની
ભાવનગર વેકેશનમાં બે બાળકો સાથે પતિ પાસે આવેલી નયનાબેન રબારી અને પતિ શૈલેષ તા.5ના વહેલી સવારે જાગ્યા હતા. નયનાએ સુરત જવાની ના કહી અને બન્ને વચ્ચે ફરી એ જ મામલે બોલાચાલી થઈ હતી. શૈલેષના દિમાગમાં પહેલેથી જ પ્લાન નિશ્ચિત હશે કે જો પરત જવાની ના કહે તો કામ તમામ કરી નાખવું. પત્નીએ જવાની ના કહેતા શૈલેષે ઓશીકાથી પત્નીનું મોં દાબી દીધું હતું. ગૂંગળાઈ જતા પત્ની નયના ત્યાં જ બેશુધ્ધ બનીને ઢળી પડી હતી. પત્નીની હત્યા કરી શૈલેષ ડેડબોડી પાસે જ બેઠો.
પત્નીને પતાવ્યા બાદ બન્ને બાળકોની નિંદ્રાધીન હાલતમાં જ હત્યા કરી નાખી
પત્નીને ઓશીકાથી શ્વાસ ગૂંગળાવી નાખ્યા બાદ જંગલી બનેલા શૈલેષે બન્ને બાળકોને પણ છોડ્યા ન હતા. સોફા પરથી ઉભો થઈને અંદર રૂમમાં સુતેલા બન્ને માસૂમ સંતાનો પાસે પહોંચ્યો. નિંદ્રાધીન હાલતમાં રહેલા બે બાળકોમાં શૈલેષ પ્રથમ નવ વર્ષના પુત્ર ભવ્ય પર ચડી ગયો અને ભવ્યનું મોં દાબીને શ્વવાસ રુંધાવી નાખ્યા ત્યારબાદ 13 વર્ષિય પુત્રી પૃથાને પણ ઓશિકાથી મોં દાબી નિંદ્રાધીન સ્થિતિમાં જ ગૂંગળાવી નાખી ત્રણેયને માતા, બે બાળકો માટે તા.5-11ની વહેલી સવાર મોતની સવાર કે આખરી સવાર બની હતી.
ડેડબોડી પર કોટા સ્ટોન બાંધીને ખાડામાં નાખી ઉપર દરવાજો, ગાદલુ ઢાંકી દીધું
ત્રણેયની હત્યા કર્યા બાદ શૈલેષે અગાઉથી જ ક્વાર્ટરના કમ્પાઉન્ડમાં જ ખોદાવેલા મોતના ખાડામાં ત્રણષય ડેડબોડી નાખી હતી. ખાડામાં પાણી ભરાતા ડેડબોડી ઉપર તરીને ન આવે એ માટે પત્નીના મૃતદેહ સાથે ત્યાં ફળિયામાં પડેલો કોટા સ્ટોન બાંધ્યો હતો અને લાશ ઢસડીને ખાડામાં નાખી. ત્યારબાદ પુત્રીની લાશને પથ્થર બાંધીને ફેંકી એ પુત્ર ભવ્યની ડેડબોડી પણ ખાડામાં નાખી. ત્રણેય લાશ ઢાંકવા માટે નજીકમાં પડેલો જૂનો લાકડાનો દરવાજો ઉપર નાખ્યો અને ગાદલું નાખીને ત્રણેય ડેડબોડી ઢાંકી દીધી હતી.
મૃતદેહો પર માટી નાખવા સ્ટાફને જેસીબી સાથે બોલાવ્યો, ખાડો પૂર્યો
શૈલેષ ભાવનગર વન વિભાગનો અધિકારી હોવાથી આરએફઓને સૂચના આપી ખાડો ખોદાવ્યો. ખાડો બુરાઈ તેટલી માટી હોવા છતાં વધુ માટી મંગાવી રાખી હતી. લાશ ખાડામાં નાખ્યા બાદ સ્ટાફને ખાડો પુરવા બોલાવ્યો હતો. જેસીબી સાથે આવેલા સ્ટાફ પાસે ડેડબોડી પર ધૂળ નખાવી દીધી હતી અને જાણે કાંઈ જ ન થયું હોય તે રીતે સ્ટાફને ખાડો પુરાતા રવાના કરી દીધો હતો.
અરે, રહેવા ધ્યો, નીલગાય પડી ગઈ હતી, ત્યાં ન જતા નાગ છે, સ્ટાફને પણ ડરાવ્યો
ખાડો બુરવા આવેલા વન વિભાગના સ્ટાફને ક્યાં ખ્યાલ હતો કે અંદર ત્રણ-ત્રણ ડેડબોડી છે. સ્ટાફે ખાડામાં લાકડાનો દરવાજો, ગાદુલ જોતા પૂછ્યું,સાહેબ આમા તો આ શું છે, શૈલેષે કહ્યું કે આ ખાડો એટલે ફટાફટ બુરવો છે કે આમાં રાત્રે નીલગાય (રોઝડુ) પડ્યું હતું. મેં જાતે જ રેસ્ક્યુ કર્યું. સ્ટાફ ખાડા તરફ આગળ જતાં ડરાવ્યા કે અરે, આગળ ન જતા ત્યાં નાગ નીકળે છે. સ્ટાફને પણ ડરાવ્યો અને ઉંધા ચશ્મા પહેરાવ્યા. ખાડો બુરાવીને સ્ટાફને રવાના કરી દીધો.
તા.7ના પોતે જ પત્ની, બે બાળકો ગૂમ હોવાની પોલીસને જાણ કરે છે
શૈલેષ પર પરિવારજનોના સુરત ન પહોંચ્યાના, ફોન બંધ હોવાના ફોન આવ્યા. નયનાબેનના પિયર પક્ષના પણ ભાવનગર દોડી આવ્યા. શરૂઆતમાં તો શૈલેષ જાણે શોધીએ જેવો ડોળ કરી પરિવારના કહેવા અને જાણ કરવી પડશે તેવું લાગતા શૈલેષ હત્યા કર્યાના બે દિવસ બાદતા.7ના ભારતનગર પોલીસ મથકે પહોંચે છે અને જાહેર કરે છે કે પત્ની, બે બાળકો સુરત જવાનું કહ્યા બાદ ગૂમ છે.
LCBએ તપાસ હાથમાં લીધી અને કલાકોમાં ખૂલી મર્ડર મિસ્ટ્રી
ગૂમની જાહેરાત બાદ સ્થાનિક ભારતનગર પોલીસે વર્ણન મુજબ સીસીટીવી ચેક કર્યા. સિક્યુરિટી ગાર્ડની પૂછપરછ કરી તેણે પણ તા.5ના કોઈ બહાર ન નીકળ્યાનું કહ્યું. કેમેરામાં પણ ત્રણેય મા-સંતાન જતા હોય તેવું ન દેખાયું. ઘટનાની ગંભીરતાને લઈને યુવનિ પરિવાર તથા અગ્રણીઓએ કેટલાક મુદ્દાઓ સાથે એસ.પી. નીતિશકુમાર પાંડેને રજૂઆત કરી ઉંડી તપાસની માગણી કરી હતી. ઘટનાની ગંભીરતાને ધ્યાને લઈ એસપી પાંડે દ્વારા તપાસ એલસીબીને સોંપાઈ હતી. પીઆઈ એ.આર. વાળા, પીએસઆઈ પી.ડી. ઝાલા તથા ટીમે કલાકોમાં જ મહેનત કરી ટેકનીકલ સોર્સ, સ્થાનિકો, ફોરેસ્ટ કર્મચારીઓની પૂછતાછ સાથે વિગતો મેળવી હતી. ગતરોજ ખાડો ખોદતા અંદરથી ત્રણેય ડેડબોડી મળી આવતા મર્ડર મિસ્ટ્રીનો ભેદ ઉકેલાયો હતો.
એસપીને કહ્યું કે તમે રહેવા દો, હોલ્ટ રાખો, બે-ત્રણ દિવસ પછી જરૂર પડશે તો કહીશ
શાતીર દિમાગધારી વન વિભાગનો અધિકારી શૈલેષ ખાંભલા એસપી પાંડેને મળ્યો હતો. પાંડેએ જણાવ્યા મુજબ શૈલેષ કોઈના રેફરન્સથી મળવા આવ્યો હતો ત્યારે તેના ચહેરા પર એવા હાવભાવ કે દુઃખ ન હતું. પત્ની, બે બાળકો ગૂમ થયા હોય તો જલ્દી મળી આવે, જલ્દી તપાસ થાય તેવી જે રજૂઆત શબ્દો કે ભાવના હોય તેવું કાંઈ ન્હોતું. એસપીએ જ્યારે શૈલેષને કહ્યું કે, બેસ્ટ ટીમ લગાડશું, મહેનત કરશું. તો શૈલેષે ઉલ્ટાના એસપીને કહ્યું કે, અત્યારે હું મારી રીતે ટ્રાઈ કરું છું, અત્યારે હોલ્ટ રાખો, બે-ત્રણ દિવસ પછી જરૂર પડશે તો કહીશ ત્યારબાદ શૈલેષે સંપર્ક પણ કર્યો ન હતો અને સુરત ચાલ્યો ગયો હતો. આ મુદ્દા પરથી પણ પોલીસને શંકા દૃઢ બની હતી.
આરોપીને ત્રણ-ત્રણ હત્યા બાદ પણ કોઇ અફસોસ જેવું નથી
શૈલેષે પત્ની, બે બાળકોને ઠંડેકલેજે પતાવી દીધા, પોલીસને, સગા સંબંધીઓને, પરિવારને 10 દિવસ સુધી ગેરમાર્ગે દોર્યેા, ચકરાવે ચડાવ્યો. અંતે પર્દાફાશ થતાં સુરત ચાલ્યા ગયેલા શૈલેષને ભાવનગર પોલીસે પકડી પાડ્યો. એસપી પાંડે તથા એલસીબી ટીમે કરેલી પૂછતાછમાં પોપટ બની ગયેલા વન અધિકારી શૈલેષે કબુલાત આપી પરંતુ જાણે તેને કોઈ અફસોસ થયો હોય કે કોઈપણ પ્રકારની ગ્લાની ચહેરા પર ન્હોતી. મુળ મહુવાના સેંદરડાના વતની શૈલેષના 15 વર્ષ પૂર્વે લગ્ન થયા હતા. દાહોદ, જૂનાગઢ, મેંદરડામાં આરએફઓ બાદ પ્રમોશન સાથે ભાવનગર એસીએફ તરીકે એકાદ વર્ષથી ફરજ બજાવતો હતો. છેલ્લા લાંબા સમયથી અલગ રહેતી પત્ની અને બાળકોને સાથે રહેવા બાબતની પત્નીની વાતને હતી અને બન્ને વચ્ચે એ બાબતે માથાકૂટ થતી હતી અને શૈલેષે શેતાનને પણ શરમાવે તેવું કૃત્ય કર્યું.
