રાજકોટમાં ફિલ્મ જોવા નીકળેલા યુવકની જિંદગીની ‘ફિલ્મ’ કાળમુખા ટ્રકે પૂરી કરી નાખી : 18 વર્ષીય યુવકનું મોત
રાજકોટમાં ટ્રક અને ડમ્પરે અનેક જિંદગીઓ ખતમ કરી નાખી છે આમ છતાં જ્યારે જ્યારે આવા કોઈ અકસ્માત થાય એટલે બે-ત્રણ દિવસ સુધી પોલીસ કડક બનીને કાર્યવાહી કરે છે અને પછી સ્થિતિ જૈસે થે જેવી થઈ જતી હોય મૃત્યુનો સિલસિલો અટકી જ રહ્યો નથી. આવા જ એક અકસ્માતમાં 18 વર્ષીય યુવક કે જે ફિલ્મ જોવા માટે ઘેરથી નીકળ્યા બાદ કાળમુખા ટ્રકે તેની જિંદગીની ફિલ્મ જ પૂરી કરી નાખી હતી.
આ અંગે હનુમાન મઢી પાસે ચોળાફળીની રેંકડી ઉભી રાખી વેપાર કરતા અને રેલનગરમાં પેટ્રોલ પંપની બાજુમાં આસોપાલવ રેસિડેન્સીમાં રહેતા વિપુલભાઈ શાંતિલાલ સાયાણીએ નોંધાવેલી ફરિયાદમાં જણાવ્યું કે તેમનો 18 વર્ષીય પુત્ર ધ્રુવિલને ફિલ્મ જોવા જવું હોય તે તેના મિત્ર હર્ષ હરેશભાઈ ટાંક કે જે નાણાવટી ચોક પાસે રહે છે તેને લેવા માટે જઈ રહ્યો હતો.
દરમિયાન મંગળવારે બપોરે અઢી વાગ્યા આપાસ વિપુલભાઈ શાંતિનગર ગેઈટ પાસે કૈલાશ પાર્ક શેરી નં.2માં આવેલા તેમના નવા મકાન પર ચાવી લેવા ગયા ત્યારે કોઈ વ્યક્તિનો ફોન ધ્રુવિલના ફોનમાંથી તેમના ઉપર આવ્યો હતો અને કહ્યું હતું કે મેસુર ભગત ચોક પાસે અકસ્માત થયો છે અને યુવકને સિવિલ હોસ્પિટલે ખસેડાયો છે. આમ કહેતા જ વિપુલભાઈ સિવિલ હોસ્પિટલે પહેંચ્યા હતા જ્યાં તેમના પુત્રની સારવાર ચાલી રહી હતી. જો કે સારવાર કારગત ન નિવડતાં આખરે તેનું મૃત્યુ નિપજ્યું હતું. ધ્રુવિલ રેલનગરથી મોટર સાઈકલ લઈને તેના મિત્ર હર્ષ ટાંકના ઘેર નાણાવટી ચોક પાસે જઈ રહ્યો હતો ત્યારે માધાપર ચોકડી મેસુર ભગત ચોક સામે ટ્રક નં.જીજે38-ટી-0518 નંબરનો ટ્રક ધ્રુવિલના પેટ ઉપરથી ફરી ગયો હોવાનું જાણવા મળ્યું હતું.
