RMCના સ્પોર્ટસ સંકુલમાં હવે ફરજિયાત 6 નહીં, 3 માસનું સભ્યપદ પણ મળશે : આટલી ફી ચૂકવીને કોચિંગ પણ મેળવી શકાશે
રમત-ગમતપ્રેમી જનતાને કૌશલ્ય બતાવવા તેમજ શારીરિક ક્ષમતા જળવાઈ રહે તે માટે યોગ્ય પ્લેટફોર્મ આપવા મહાપાલિકા દ્વારા શહેરમાં અલગ-અલગ સ્થળે સ્પોર્ટસ સંકુલનું નિર્માણ કરવામાં આવ્યું છે. વખતોવખત આ સંકુલમાં સભ્યપદની ફી ઉપરાંત નિયમોમાં ફેરફાર કરાઈ રહ્યા છે ત્યારે હવે એક મહત્ત્વનો નિર્ણય એવો પણ લેવામાં આવ્યો છે કે હવેથી દરેક સ્પોર્ટસ સંકુલ તેમજ મેદાન પર ફરજિયાત છ મહિના નહી બલ્કે ત્રણ મહિના માટે પણ સભ્યપદ આપવામાં આવશે. આ અંગેની દરખાસ્ત મ્યુ.કમિશનર દ્વારા કરાતા સોમવારે સ્ટેન્ડિંગ કમિટી દ્વારા તેના પર નિર્ણય લેવાશે.
માર્ચ મહિનામાં જેનું લોકાર્પણ કરાયું તે મવડી ઈનડોર સ્ટેડિયમમાં હાલ બેડમિન્ટન, વોલીબોલ, ટેનિસ અને બાસ્કેટબોલ એમ ચાર રમત રમાઈ રહી છે અને આવતા મહિનાથી વધુ રમત રમી શકાશે. એકંદરે અહીં યોગ, ચેસ, કેરમ, ટેબલ ટેનિસ, જીમ, સિન્થેટિક એથ્લેટિક ગ્રાઉન્ડ, સ્કવોશ, સ્વિમિંગ સહિતની રમતોની વ્યવસ્થા પણ હોય તેને પણ શરૂ કરવા કવાયત ચાલી રહી છે. આ માટે અગાઉ એક મહિનાથી લઈ છ મહિના સુધીનું ફરજિયાત સભ્યપદ લેવું પડતું હતું જેમાં સુધારોકરી ત્રણ મહિના અને એક વર્ષ એમ બે જ સભ્યપદનો નિયમ ઘડવામાં આવ્યો છે. આ માટેની ફી 150થી લઈ 11000 સુધીની રહેશે. આ સ્પોર્ટસ સંકુલમાં અલગ-અલગ 15 રમત માટે કોચની વ્યવસ્થા પણ કરવામાં આવશે જેના માટે દર મહિને એક હજારથી ત્રણ હજારની ફી નક્કી કરાઈ છે.
આ જ પ્રમાણે રેસકોર્સ સંકુલ તેમજ મહાપાલિકા હસ્તકના રમત-ગમતના મેદાનો માટે સિક્યોરિટી ડિપોઝિટ, ભાડુ સહિતના નિયમો અમલમાં હતા જેમાં ડિપોઝિટ હટાવવા, સમય નક્કી કરવા સહિતના નિયમો નક્કી કરાયા છે જેને સોમવારે સ્ટેન્ડિંગ કમિટી મંજૂરી આપશે. એકંદરે અત્યાર સુધી અલગ-અલગ સંકુલ માટે નિયમો બનાવાયા હતા તે તમામને એક કરી કામગીરી સરળ કરવામાં આવી હોવાનું જાણવા મળ્યું છે.
રેસકોર્સ ક્રિકેટ સ્ટેડિયમના પેવેલિયનનું નવીનીકરણ સહિતની 33 દરખાસ્ત
સોમવારે ચેરમેન જયમીન ઠાકરના અધ્યક્ષસ્થાને મળનારી સ્ટેન્ડિંગ કમિટીની બેઠકમાં 33 દરખાસ્ત પર નિર્ણય લેવામાં આવશે જેમાં રેસકોર્સ ખાતે માધવરાવ સિંધિયા ક્રિકેટ સ્ટેડિયમના પેવેલિયનનું 6.11 કરોડના ખર્ચે નવીનીકરણ, કનક રોડ પર આવેલું વર્ષો જૂનું ફાયર સ્ટેશન તોડી તેના સ્થાને 12.42 કરોડના ખર્ચે નવું ફાયર સ્ટેશન સહિતની દરખાસ્ત સમાવિષ્ટ છે.
