RMC-પોલીસના 15 કેમેરાને ‘આંધળા’ કરનાર ટોળકી પકડાઈ : કેમેરાની બેટરી ચોરી કરનાર સગીર સહિત ત્રણની ધરપકડ
ટ્રાફિકનું સુચારું સંચાલન થાય, કોઈ પ્રકારનો ગુનો બને તો આરોપી સુધી ઝડપથી પહોંચી શકાય, રસ્તા પર દબાણો ન થઈ જાય તે સહિતના મુદ્દા પર નજર રાખવા માટે આઈ-વે પ્રોજેક્ટ હેઠળ મહાપાલિકા-પોલીસ દ્વારા શહેરના અલગ-અલગ પોઈન્ટ ઉપર સીસીટીવી મુકવામાં આવ્યા છે. જો કે એક ટોળકી દ્વારા 17 દિવસની અંદર 15 જેટલા કેમેરાને `આંધળા’ કરી નાખવામાં આવ્યા હોવાની ફરિયાદ નોંધાતાં જ શહેરની નાસતા-ફરતા સ્કવોડ ઝોન-2ની ટીમ દ્વારા એક સગીર સહિત ત્રણ લોકોને દબોચી લેવામાં આવ્યા હતા.
મહાપાલિકાના નાનામવા ખાતે આવેલા સીસીટીવી કંટ્રોલમ રૂમમાં પ્રોજેક્ટર મેનેજર તરીકે નોકરી કરતાં મનિષ રમેશભાઈ કોરાટે ફરિયાદ નોંધાવી હતી કે ગુરૂવારે સવારે 11 વાગ્યા આસપાસ કંટ્રોલ રૂમમાં કેમેરા ચેક કરી રહ્યો હતો ત્યારે જ્યુબિલી ચોકના કેમેરા બંધ હાલતમાં જોવા મળ્યા હતા. ત્યાં જઈને તપાસ કરતાં સીસીટીવીના સેટઅપ બોક્સ આઉટડોર કેબિનેટમાંથી ત્રણ નંગ બેટરી ગાયબ જોવા મળી હતી.
આ અંગેની ફરિયાદ નોંધાતાં જ ડીસીપી જગદીશ બાંગરવાના માર્ગદર્શન હેઠળ ઝોન-2 નાસતા-ફરતા સ્કવોડની ટીમના પીએસઆઈ આર.આર.કોઠિયા, હેડ કોન્સ્ટેબલ ધર્મેન્દ્રસિંહ ઝાલા, અંકિત નિમાવત, અનિલ જીલરિયા, અમિન ભલુર, પ્રશાંત ગજેરા સહિતની ટીમ દ્વારા શાસ્ત્રી મેદાન પાસેથી સુરેશ લાલુભાઈ ચારોલિયા (રહે.મહિલા કોલેજ અન્ડરબ્રિજની ઉપર રેલવે પાટા પાસે ઝુપડામાં), ધીરૂ જીલુભાઈ વાજેલા (ઉ.વ.30) અને એક સગીરને 1.45 લાખની કુલ 29 ચોરાઉ બેટરી તેમજ રિક્ષા સાથે પકડી પાડ્યા હતા.
આ પણ વાંચો : આવતીકાલે ગ્રામ પંચાયતની ચૂંટણી : રાજકોટના 107 સરપંચ-588 સભ્યોને ચૂંટવા 1.26 લાખ મતદારો બેલેટ પેપરથી કરશે મતદાન
આ ટોળકી દ્વારા એસ્ટ્રોન ચોક, એસ્ટ્રોન ગાર્ડન, એનસીસી ચોક, રેસકોર્સ ટેનિસ કોર્ટ, જ્યુબિલી ચોક, સોરઠિયાવાડી ગાર્ડન, પારૂલ ગાર્ડન, હિંગળાજ ચોક, કાંતાસ્ત્રી વિકાસ ઓડીસી-1, આંબેડકર કોલોની, મહિલા કોલેજ, નાનામવા સર્કલ, યાજ્ઞિક રોડ, સદર બજાર અને જ્યુબિલી ચોક સહિતના પોઈન્ટ ઉપરથી બેટરીની ચોરી કરવામાં આવી હતી. જો કે તેનું વેચાણ કરે તે પહેલાં જ ત્રણેયને દબોચી લેવાયા હતા.
