ભારતના આ રાજ્ય પર અંગ્રેજ અને મુગલ ન સ્થાપી શક્યા પોતાનું સામ્રાજ્ય, જાણો શું છે તેની પાછળનો ઇતિહાસ

હાલ વેકેશનનો સમય ચાલી રહ્યો છે. લોકો પોતાના પરિવાર અને બાળકો સાથે ભારતના અનેક સ્થળોએ ફરવા જતાં હોય છે. હાલ લોકોની ફેવરિટ જગ્યાઓમાંની એક છે ગોવા જ્યાં સામાન્ય લોકોથી લઈને સેલિબ્રિટિઝ પણ વેકેશન માણવા જતાં હોય છે. ત્યારે શું તમે જાણો છો કે ગોવા એક માત્ર એવું સ્થળ છે અંગ્રેજો અને મુઘલો ક્યારેય પોતાનું શાસન સ્થાપિત કરી શક્યા નહીં, ત્યારે ચાલો જાણીએ શું છે આ પાછળનો ઇતિહાસ.

ભારતને આઝાદ કરવામાં ભારતના દરેક લોકોનો એટલો ફાળો છે. ભારતમાં વેપાર કરવાના બહાને આવેલા અંગ્રેજોએ ભારત પર અનેક વર્ષો સુધી શાસન કર્યું હતું. ભારતની સ્વતંત્રતા ચળવળ ઇતિહાસમાં સૌથી શક્તિશાળી અહિંસક પ્રતિકાર ચળવળોમાંની એક છે. અંગ્રેજોએ લગભગ 200 વર્ષ સુધી ભારત પર શાસન કર્યું. તેઓ પહેલા ઇસ્ટ ઇન્ડિયા કંપની દ્વારા વેપાર કરવા આવ્યા હતા, પરંતુ ધીમે ધીમે જમીન પર કબજો જમાવ્યો. 1857માં થયેલા મોટા બળવા પછી, બ્રિટિશ સરકારે સંપૂર્ણ નિયંત્રણ મેળવી લીધું અને ભારત પર શાસન કરવાનું શરૂ કર્યું. મહાત્મા ગાંધી, જવાહરલાલ નેહરુ અને સુભાષ ચંદ્ર બોઝ જેવા ઘણા ભારતીય નેતાઓએ સ્વતંત્રતા માટે શાંતિપૂર્ણ વિરોધ પ્રદર્શનોનું નેતૃત્વ કર્યું. લાંબા સંઘર્ષ પછી, ભારત આખરે 15 ઓગસ્ટ, 1947ના રોજ આઝાદ થયું હતું.

અંગ્રેજોએ લગભગ 200 વર્ષ સુધી ભારત પર શાસન કર્યું

અંગ્રેજોએ લગભગ 200 વર્ષ સુધી ભારત પર શાસન કર્યું. જોકે, આ બધાની વચ્ચે, દેશમાં એક એવો પ્રદેશ હતો જ્યાં ન તો મુઘલો પોતાનું શાસન સ્થાપિત કરી શક્યા અને ન તો અંગ્રેજો પ્રવેશવાની હિંમત કરી શક્યા. એ જગ્યા બીજું કોઈ નહીં પણ ગોવા હતી.

ગોવા ભારતનો એકમાત્ર એવો પ્રદેશ હતો જ્યાં મુઘલો કે અંગ્રેજો જીતી શક્યા નહીં. જોકે, તે સ્વતંત્ર નહોતું, કારણ કે તે પોર્ટુગીઝ શાસન હેઠળ રહ્યું. અહેવાલો અનુસાર, પોર્ટુગીઝોએ ગોવા પર લગભગ 400 વર્ષ શાસન કર્યું. બાકીના ભારતને સ્વતંત્રતા મળ્યાના 14 વર્ષ પછી ગોવાને તેની સ્વતંત્રતા મળી.

17મી સદીમાં, જ્યારે મુઘલો આ સ્થળ પર કબજો કરવા માંગતા હતા, ત્યારે તેમને વિરોધનો સામનો કરવો પડ્યો હતો. પોર્ટુગીઝોએ મજબૂત કિલ્લેબંધી બનાવી અને તેમની નૌકાદળ શક્તિને કારણે તેઓ મુઘલોથી બચી ગયા. વાસ્તવમાં, મુઘલોને ઉત્તર ભારત સહિત અન્ય વિસ્તારોમાં ઘણા પડકારોનો સામનો કરવો પડ્યો હતો, તેથી તેમણે ગોવા પર ઓછું ધ્યાન આપ્યું. આ કારણોસર ગોવા મુઘલ શાસનથી અસ્પૃશ્ય રહ્યું.

અંગ્રેજો પણ અહીં પોતાનું શાસન સ્થાપિત કરી શક્યા નહીં. તેમની પાસે ગોવા કબજે કરવાની તક હતી, પરંતુ તેમણે ગોવાનો સમાવેશ વસાહતી પ્રદેશમાં ન કર્યો, પરંતુ તેના બદલે રાજદ્વારી ચાલ ચલાવી. એંગ્લો-પોર્ટુગીઝ સંબંધો સારા હતા, જેના દ્વારા અંગ્રેજોએ ગોવાને ભારતીય રેલ નેટવર્ક સાથે જોડ્યું, જેનાથી વેપારમાં વધારો થયો. બદલામાં અંગ્રેજોએ ગોવામાં પોર્ટુગીઝ વહીવટ જાળવી રાખ્યો. આના કારણે બંનેને ફાયદો થયો.