ભારત સાથે ખૂબ સારી રીતે વાતચીત થઈ રહી છે, ટુંક સમયમાં જ સમજૂતી: ટ્રમ્પ

ટ્રમ્પે શરૂ કરેલા ટેરીફ વોરને કારણે સર્જાયેલી આર્થિક અનિશ્ચિતતાઓ વચ્ચે ભારત માટે સારા સમાચાર છે.મંગળવારે અમેરિકી રાષ્ટ્રપતિ ડોનાલ્ડ ટ્રમ્પે ભારત સાથે વેપાર ટેરિફ પરની વાતચીત ખૂબ સારી રીતે આગળ વધી રહી હોવાની અને ટૂંક સમયમાં સમજૂતી થવાની આશા વ્યક્ત કરી હતી. એવું માનવામાં આવે છે કે આ સમજૂતી ભારત માટે અન્ય કોઈ પણ દેશ કરતાં વધુ ફાયદાકારક બની રહેશે.

મંગળવારે રોઇટર્સે પણ ભારત સરકારના અધિકારીઓને ટાંકીને અહેવાલ આપ્યો હતો કે કેન્દ્ર સરકાર અમેરિકા સાથેની વેપાર વાતચીતમાં એક ‘સ્વીટનર’ ઉમેરવા માટે તૈયાર છે એટલે કે તેમાં ભારત માટે અનેક વધારાની રાહતો અને સાથે જ અમેરિકાને પણ પસંદ હોય તેવી દરખાસ્તો પર સમજૂતી માટેનો તખ્તો ગોઠવાઈ ગયો છે.

અહેવાલમાં વધુમાં જણાવાયું હતું કે “ફોરવર્ડ મોસ્ટ-ફેવર્ડ-નેશન”ની કલમ, જે ભારત સરકારે અગાઉની વેપાર વાતચીતમાં ભાગ્યે જ આપી હતી તે આપમેળે અમેરિકા પર લાગુ થશે. જેનાથી અમેરિકાને પણ અન્ય કોઈ દેશો કરતા ભારત તરફથી બહેતર ટેરિફ શરતો આપમેળે મળશે.

એ અગાઉ અમેરિકી નાણાં સચિવ સ્કોટ બેસેન્ટે પણ ભારત સાથેની વેપાર વાતચીત સારી રીતે આગળ વધી રહી હોવાનું જણાવી ભારત અમેરિકા સાથે સમજૂતી કરનાર પ્રથમ દેશ બનશે તેવો નિર્દેશ આપ્યો હતો. ટ્રમ્પે પણ ટેરિફ મોકૂફીની 90 દિવસની મુદત પૂરી થાય તે પહેલા ભારત સહિતના દેશો સાથે વેપાર સમજૂતી કરવાની ઉત્સુકતા દર્શાવી હતી.