44.4 ડીગ્રી સાથે રાજકોટ અગનગોળો
એપ્રિલ માસના 27 દિવસમાં મહત્તમ તાપમાન સતત 42 ડિગ્રીથી ઉપર રહ્યું : 9 એપ્રિલે પારો પહોંચ્યો હતો 45.2 ડિગ્રીએ
ચૈત્રી દનૈયા પૂર્ણ થવા છતાં હજુ સૂર્યદેવતા ખમૈયા લેતા નથી, રવિવારે રાજકોટમાં રવિ બરાબરનો તપતા રીતસરના અગનગોળા વરસતા હોય તેવી અનુભૂતિ વચ્ચે મહત્તમ તાપમાનનો પારો 44.4 ડિગ્રીએ સ્થિર થયો હતો જે સમગ્ર રાજ્યમાં સૌથી વધુ હતું.ઉલ્લેખનીય છે કે, એપ્રિલ મહિનામાં સૌથી વધુ 45.2 ડીગ્રી તાપમાન તા.9 એપ્રિલ નોંધાયા બાદ રાજકોટમાં બીજી વખત હાઈએસ્ટ તાપમાન રવિવારે નોંધાયું હતું.
એક તરફ હવામાન વિભાગે સમગ્ર દેશમાં કમોસમી વરસાદની આગાહી કરી છે તેવા સમયે જ રાજ્યમાં ગરમી હાહાકાર મચાવી રહી છે. ચાલુ એપ્રિલ માસમાં ગરમીએ રાજકોટમાં રેકોર્ડ સર્જ્યો છે. તા.1 એપ્રિલથી સતત રાજકોટમાં મહત્તમ તાપમાન 42 ડીગ્રીથી ઉપર નોંધાયું હતું જેમાં 9 એપ્રિલ મહત્તમ તાપમાનનો પારો 45.2 ડીગ્રી નોંધાયો હતો. બીજી તરફ રવિવારે ફરી એક વાર રાજ્યમાં સૌથી વધુ ગરમી રાજકોટમાં 44.4 ડીગ્રી નોંધાઇ હતી.
રવિવારે રાજકોટમાં 44.4, ભુજમાં 43.8, અમરેલીમાં 43.5, ડીસામાં 42.3, અમદાવાદમાં 41.8, ગાંધીનગરમાં 40.8, વડોદરામાં 40.2, નલિયામાં 38.4, ભાવનગરમાં 37.2, કંડલામાં 36.7, જામનગરમાં 35.6 અને પોરબંદરમાં 35 ડીગ્રી મહત્તમ તાપમાન નોંધાયું હતું. નોંધનીય છે કે હજુ પણ આગામી 24 કલાક બાદ મહત્તમ તાપમાનમાં 2થી 3 ડીગ્રીનો વધારો થવાની હવામાન વિભાગે આગાહી કરી છે.
