દિલ્હીમાં રાજકોટનો ડંકો વાગ્યો : દેશના 780 જિલ્લાઓને પાછળ છોડી વડાપ્રધાનના હસ્તે મેળવ્યો એવોર્ડ
17માં સિવિલ સર્વિસ દિવસની ઉજવણી પ્રસંગે સોમવારે નવી દિલ્હીના વિજ્ઞાન ભવન ખાતે વડાપ્રધાન નરેન્દ્ર મોદીના હસ્તે રાજકોટ જિલ્લા કલેક્ટર પ્રભવ જોશીને જિલ્લાના સર્વાંગી વિકાસમાં જિલ્લા પ્રશાસન દ્વારા આપવામાં આવેલ શ્રેષ્ઠ યોગદાન બદલ હોલિસ્ટિક ડેવલોપમેન્ટ કેટેગરીમાં એક્સલેન્સી ઈન પબ્લિક એડમિનિસ્ટ્રેશન એવોર્ડ આપવામાં આવ્યો હતો. ઉલ્લેખનીય છે કે, દેશના 780 જિલ્લામાંથી આ એવોર્ડ માટેની પસંદગી કરવામાં આવતી હોય છે જેમાં વર્ષ-2024માં અગ્રતાક્રમે રહી રાજકોટે બાજી મારી છે. આ કેટેગરીમાં દેશના કુલ પાંચ જિલ્લા પસંદ કરવામાં આવ્યા હતા જેમાં રાજકોટ પ્રથમ રહેતા દિલ્હીમાં રાજકોટનો ડંકો વાગ્યો છે અને 20 લાખનો પુરસ્કાર પણ મળ્યો છે.
પીએમ એવોર્ડ મુખ્યત્વે ત્રણ કેટેગરીમાં આપવામાં આવે છે જે પૈકી હોલિસ્ટિક ડેવલોપમેન્ટ ઓફ ડીસ્ટ્રીકટ અંતર્ગત રાજકોટ જિલ્લામાં હર ઘર જલ યોજના, પ્રધાનમંત્રી આવાસ યોજના શહેરી અને ગ્રામીણ, મિશન ઇન્દ્રધનુષ, પ્રધાનમંત્રી જન આરોગ્ય યોજના (આભાકાર્ડ), પીએમએસવીએ નિધિ, પ્રધાનમંત્રી માતૃવંદના યોજના, કિશાન ક્રેડિટ કાર્ડ, પીએમ વિશ્વકર્મા યોજના, સક્ષમ આંગણવાડી અને પોષણ તેમજ પીએમ સૂર્યઘર યોજના એમ કુલ 11 કેટેગરીની કામગીરીની નોંધ લઈ કુલ 780 જિલ્લામાંથી રાજકોટની પસંદગી કરવામાં આવી હતી.નોંધનીય છે કે, પ્રધાનમંત્રી સૂર્યઘર યોજના અને પીએમ આવાસ યોજનામાં રાજકોટ જિલ્લાની કામગીરી સમગ્ર દેશ અને રાજ્યમાં ટોચ ઉપર હોય પીએમ એવોર્ડ 2024 માટે પસંદગી કરવામાં આવી હતી.
નોંધનીય છે કે,વડાપ્રધાન એવોર્ડ માટે જિલ્લાની પસંદગી માટે માત્ર આંકડાકીય લક્ષ્યાંક સિદ્ધિ પર નહીં પરંતુ સુશાસન પદ્ધતિ, ગુણવત્તાપૂર્વક સિદ્ધિઓ અને અંતિમ લાભાર્થી સુધી વિતરણ પર આધારિત હતું. જેમાં વહીવટી પારદર્શિતા વધારવી અને ભ્રષ્ટાચાર અટકાવવો, વિવિધ યોજનાઓનું સંકલન, માનવ સંસાધનોની ક્ષમતા નિર્માણ, ફરિયાદ નિવારણ પદ્ધતિ અને પ્રતિસાદ વ્યવસ્થા તેમજ જનભાગીદારી મુખ્ય રહ્યા હતા.પીએમ એવોર્ડ માટેની પસંદગીમાં તમામ પાસાઓની ચકાસણી માટે કેન્દ્ર સરકારના બે અધિકારીઓની ટીમ દ્વારા રાજકોટ આવીને વિવિધ યોજનાઓના અમલીકરણનું સ્થળ ચકાસણી પણ કરવામાં આવી હતી.સોમવારે જિલ્લા કલેક્ટર પ્રભવ જોશીનું નવી દિલ્હી ખાતે ટ્રોફી, પ્રમાણપત્ર અને 20 લાખના પુરસ્કાર સાથે સન્માન કરવામાં આવ્યું હતું.
રાજકોટ જિલ્લાની સિદ્ધિ
- હર ઘર નળ, મિશન ઇન્દ્રધનુષ, પોષણ 2.0 અને એબી-પીએમજેવાયમાં 100 ટકા સિદ્ધિ
- પીએમ સુર્ય ઘર મફ્ત વીજળી યોજના હેઠળ 32,000થી વધુ સોલર રૂફટોપ (111 મેગાવોટ)
- પીએમએવાય શહેરી આવાસ અંતર્ગત 9,200થી વધુ આવાસનું નિર્માણ
- 12 હાઉસિંગ પ્રોજેક્ટને ગ્રીન બિલ્ડિંગ પ્રમાણપત્ર
- પીએમએવાય-રિડેવલપમેન્ટ ઘટક હેઠળ 47 વર્ષ જૂની અરવિંદ મણિયાર હાઉસિંગ સોસાયટીનો પુનર્વિકાસ
- લાઈટ હાઉસ પ્રોજેક્ટ અન્વયે 1,144 આવાસો નિર્માણમાં મોડ્યુલર ટનલ ફોર્મવર્ક ટેક્નોલોજીનો ઉપયોગ કરીને સમય અને ખર્ચની બચત
- એબી-પીએમજેએવાયમાં 15.3 લાખ લાભાર્થીઓને આયુષ્માન કાર્ડ કાઢી અપાયા, રૂ.1,165 કરોડથી વધુના કુલ 3.76 લાખ દાવાઓનો નિકાલ
- ઉપલેટા અને ગોંડલના સબ ડિસ્ટ્રિક્ટ હોસ્પિટલમાં 10 બેડના નવજાત શિશુ સંભાળ યુનિટ નિર્માણ
- પોષણ 2.0 હેઠળ ડીએમએફ અને સીઆરએસ ફંડના એકીકરણથી ચીક્કી અને રમકડાં દૂધ અને પોષણ કિટ્સ વિતરણ
- 394 પોષણ વાટિકાની સ્થાપના
