ચીને પોતાના કયા નાગરિકોને અમેરિકા નહિ જવાની સૂચના આપી ? જુઓ
ચીને અત્યાર સુધીનું સૌથી મોટું પગલું ભર્યું છે. ચીન અને અમેરિકા વિશ્વ પર પોતાનું વર્ચસ્વ સ્થાપિત કરવાની કોઈ તક છોડવાના મૂડમાં નથી. ચીને તેના ઘણા લોકોને અમેરિકાની મુસાફરી ટાળવાની સૂચના આપી છે. અમેરિકા અને ચીન આર્ટિફિશિયલ ઇન્ટેલિજન્સમાં પોતાનું વર્ચસ્વ સ્થાપિત કરવા માંગે છે અને આ માટે કોઈ કસર છોડવાના મૂડમાં હોય તેવું લાગતું નથી.
વોલ સ્ટ્રીટ જર્નલ અનુસાર, ચીની અધિકારીઓ હાલમાં તેમના દેશના ટોચના એઆઈ ઉદ્યોગસાહસિકો અને સંશોધકોને અમેરિકાની મુસાફરી ટાળવા સૂચના આપી રહ્યા છે. અધિકારીઓ ચિંતિત છે કે વિદેશ પ્રવાસ કરી રહેલા ચીની એઆઈ નિષ્ણાતો દેશની પ્રગતિ વિશે ગુપ્ત માહિતી શેર કરી શકે છે.
ડ્રેગનને ડર લાગે છે
આ ઉપરાંત, ડ્રેગનને એ પણ ડર છે કે અધિકારીઓને અટકાયતમાં લેવામાં આવી શકે છે અને તેમનો ઉપયોગ યુએસ-ચીન વાટાઘાટોમાં સોદાબાજી માટે થઈ શકે છે. ચીને કેટલાક નિયમો પણ બહાર પાડી દીધા છે.
અહેવાલ મુજબ, જે ચીની અધિકારીઓ આ પ્રવાસનો વિકલ્પ પસંદ કરે છે તેમને સૂચના આપવામાં આવે છે કે તેઓ જતા પહેલા અને પાછા ફરતી વખતે તેમની યોજનાઓ વિશે માહિતી આપે, અધિકારીઓને જણાવે કે તેઓએ શું કર્યું અને કોને મળ્યા.
દરમિયાન, ડીપસીકના સ્થાપક લિયાંગ વેનફેંગે ફેબ્રુઆરીમાં પેરિસમાં યોજાનારી એઆઈ સમિટમાં હાજરી આપવાનું આમંત્રણ નકારી કાઢ્યું. આ ઉપરાંત, અન્ય એક મોટા ચીની એઆઈ સ્ટાર્ટઅપના સ્થાપકે ગયા વર્ષે બેઇજિંગના નિર્દેશો પછી તેમનો યુએસ પ્રવાસ રદ કર્યો હતો.
