મહાશિવરાત્રિએ મહાપાલિકાએ ‘ગ્રાહક’ બની પકડ્યું નોનવેજનું વેચાણ !
૧૫૦ ફૂટ રોડ પર ઈન્ફિનિટી કોમ્પલેક્સમાં સ્વિગીના સ્ટોર તેમજ આર.કે.આઈકોનિક કોમ્પલેક્સમાં ઝેપ્ટોના સ્ટોર પર દરોડો: ૯૫ કિલો નોનવેજ પકડાયું
બી-ડિવિઝન પોલીસે ભગવતીપરામાં બંધબારણે ધમધમતું કતલખાનું પકડ્યું
મહાશિવરાત્રિના પાવન પર્વે મહાપાલિકા દ્વારા શહેરમાં નોનવેજના વેચાણ તેમજ સ્ટોર ઉપર સજ્જડ પ્રતિબંધ ફરમાવી દેવામાં આવ્યો હતો આમ છતાં અમુક તત્ત્વો દ્વારા આ જાહેરનામાનો ઉલાળિયો કરવામાં આવી રહ્યાનું ધ્યાન પર આવતાં જ ખુદ મહાપાલિકાએગ્રાહક’ બનીને એક સ્થળેથી ૬૦ કિલો નોનવેજ પકડ્યું હતું તો એક સ્થળે નોનવેજ વેચાઈ રહ્યાની ફરિયાદ મળતાં દરોડો પાડીને ૩૫ કિલો જથ્થો જપ્ત કર્યો હતો. આ જ રીતે બી-ડિવિઝન પોલીસે ભગવતીપરામાં દરોડો પાડી બંધબારણે ધમધમતું કતલખાનું પકડી પાડ્યું હતું.
મહાપાલિકાની સોલિડ વેસ્ટ મેનેજમેન્ટ શાખાને ફરિયાદ મળી હતી કે ૧૫૦ ફૂટ રિંગરોડ પર આર.કે.આઈકોનિક બિલ્ડિંગમાં ડ્રોગેરિયા સેલર પ્રા.લિ. કે જે ઝેપ્ટો' તરીકે ઓળખાય છે ત્યાં નોનવેજનું ઓનલાઈન વેચાણ ચાલી રહ્યું છે. આ ફરિયાદના આધારે ચેકિંગ કરાતાં ૩૫ કિલો કાચું માંસ મળી આવતાં તેને જપ્ત કરી પેઢી સંચાલકને દસ હજારનો દંડ ફટકારાયો હતો. જ્યારે આરોગ્ય શાખાના અધિકારી જયેશ વંકાણીએગ્રાહક’ બની ૧૫૦ ફૂટ રોડ પર ઈન્ફિનિટી કોમ્પલેક્સમાં કાર્યરત સ્વિગીના સ્ટોરમાં ઓનલાઈન ચીકન અને શીકનો ઓર્ડર આપતાં તેનો સ્વીકાર કરાતાં જ ટીમે પહોંચી જઈને ૬૦ કિલો નોનવેજ પકડી પાડી પેઢીને દસ હજારનો દંડ ફટકાર્યો હતો.
આ જ રીતે બી-ડિવિઝન પોલીસ સ્ટાફે ભગવતીપરામાં નંદનવન સોસાયટી, એસબીઆઈના એટીએમવાળી શેરીમાં રઝવીયા મદ્રેસા સામે ઈકબાલ ઓસમાણભાઈ બાવનકાની ઓરડીમાં દરોડો પાડી તપાસ કરાતાં ત્યાં કતલ કરાયેલો પાડો તેમજ બે જીવતા પાડા મળી આવતાં ઈકબાલની ધરપકડ કરવામાં આવી હતી.
