હવે 16 વર્ષથી નાની ઉંમરના બાળકો લેટ નાઈટ મૂવી નહીં જોઈ શકે… !! આ રાજ્યમાં હાઇકોર્ટે મૂક્યો પ્રતિબંધ
તેલંગાણા હાઈકોર્ટે મોડી રાત્રે સિનેમાઘરો અને મલ્ટિપ્લેક્સમાં 16 વર્ષથી ઓછી ઉંમરના બાળકોના પ્રવેશ પર પ્રતિબંધ મૂકવાનો નિર્દેશ આપ્યો છે. કોર્ટે સ્પષ્ટ કર્યું છે કે જ્યાં સુધી રાજ્ય સરકાર આ સંદર્ભમાં નિયમો નહીં બનાવે ત્યાં સુધી બાળકોને રાત્રે 11 વાગ્યા પછી ફિલ્મો જોવાની મંજૂરી આપવામાં આવશે નહીં. તેલંગાણા હાઈકોર્ટનું આ પગલું બાળકોની સુરક્ષા અને તેમના માનસિક સ્વાસ્થ્યને પ્રાથમિકતા આપવાની દિશામાં એક મહત્વપૂર્ણ નિર્ણય છે. હવે રાજ્ય સરકારે આ મુદ્દે નિયમો બનાવવા પડશે અને શક્ય તેટલી વહેલી તકે તેનો અમલ કરવો પડશે.
હાઈકોર્ટે પોતાનો અભિપ્રાય વ્યક્ત કરતી વખતે કહ્યું હતું કે 16વર્ષથી ઓછી ઉંમરના બાળકોને રાત્રે 11 વાગ્યા પછી થિયેટર અને મલ્ટિપ્લેક્સમાં ફિલ્મો જોવાની મંજૂરી આપવી જોઈએ નહીં.
હાઈકોર્ટે સરકારને સૂચનાઓ આપી
હાઈકોર્ટે તેલંગાણા સરકારને પહેલા તમામ સંબંધિત પક્ષોનો સંપર્ક કરવાનો નિર્દેશ આપ્યો. આ પછી, સવારે 11 વાગ્યા પહેલા અને રાત્રે 11 વાગ્યા પછી 16વર્ષથી ઓછી ઉંમરના બાળકોને થિયેટર/મલ્ટીપ્લેક્સમાં પ્રવેશ અટકાવવા સૂચનાઓ જારી કરવી જોઈએ.
કોર્ટે કહ્યું કે જ્યાં સુધી આ પ્રકારનો નિર્ણય ન આવે ત્યાં સુધી, પ્રતિવાદીઓ 16 વર્ષથી ઓછી ઉંમરના બાળકોને રાત્રે 11 વાગ્યા પછી ફિલ્મો જોવાની મંજૂરી આપશે નહીં. સોમવારે હાઈકોર્ટ રામ ચરણ અભિનીત ફિલ્મ ‘ગેમ ચેન્જર’ અને અન્ય ફિલ્મ્સની ટિકિટના ભાવમાં વધારાને લગતી અરજીઓ પર સુનાવણી કરી રહી હતી. આ સમય દરમિયાન આ સૂચનાઓ આપવામાં આવી હતી.
અરજદારે શું કહ્યું ?
તમને જણાવી દઈએ કે અરજદાર વિજય ગોપાલના વકીલે પોતાની દલીલમાં કહ્યું હતું કે સગીરોને મોડી રાત્રે ફિલ્મો જોવાની મંજૂરી ન આપવી જોઈએ, કારણ કે તેનાથી તેમના શારીરિક અને માનસિક સ્વાસ્થ્ય પર પ્રતિકૂળ અસર પડશે. તેમણે કહ્યું કે મલ્ટિપ્લેક્સમાં છેલ્લો શો રાત્રે 1.30 વાગ્યા સુધી ચાલે છે અને મોડી રાત્રિના શો દરમિયાન સગીરોના થિયેટરોમાં પ્રવેશને નિયંત્રિત કરવા માટે કોઈ નિયંત્રણો નથી.
આ ઉપરાંત તેમણે એમ પણ કહ્યું કે સરકારે થિયેટરોમાં સગીરોના પ્રવેશને નિયંત્રિત કરવા માટે તાત્કાલિક નિર્ણય લેવો જોઈતો હતો. યાદ રહે કે ગયા વર્ષે ડિસેમ્બરમાં સંધ્યા થિયેટરમાં ‘પુષ્પા 2’ના સ્ક્રીનિંગ દરમિયાન ભાગદોડ મચી ગઈ હતી. આ ઘટનામાં એક સગીર છોકરો ગંભીર રીતે ઘાયલ થયો હતો અને તેની માતાનું મોત નીપજ્યું હતું.
