- અમદાવાદના જવેલર્સને ત્યાં ૨૭ કિલોથી વધુ ચાંદી અને ૧૧ લાખથી વધુ રોકડની ચોરી થઇ હતી
- પોલીસે મુદ્દામાલ કબજે કર્યો હતો પણ કાનૂની ગુંચને લીધે ફરિયાદીને પરત સોંપ્યો ન હતો
અમદાવાદ
અમદાવાદમાં આજથી ૧૩ વર્ષ પહેલા સોના-ચાંદીની ચોરી થઇ હતી અને થોડા સમય બાદ ચોર મુદામાલ સાથે પકડાઈ પણ ગયા હતા પરંતુ વેપારીને કાનૂની લડત પછી પણ તેનો ચોરાયેલો મુદ્દામાલ પરત નહી મળતા હાઇકોર્ટનું શરણુ લીધું છે અને હાઇકોર્ટે સંબંધિત પોલીસ સ્ટેશન પાસે ખુલાસો પણ માગ્યો છે.
અમદાવાદનાં આંબાવાડી, જીરાવાલા ગોલ્ડ પેલેસમાં આવેલી સુમિતકુમાર શાહની ઝવેરાતની દુકાનમાં એપ્રિલ ૨૦૧૨માં ૨૭.૨૫ કિલો ચાંદી અને ૧૧.૭૦ લાખ રૂપિયાની ચોરી થઇ હતીઅને ફરિયાદીએ ગુજરાત યુનિવર્સિટી પોલીસ સ્ટેશનમાં ફરિયાદ નોંધાવી હતી. ઓગસ્ટ ૨૦૧૨માં, શહેર ક્રાઈમ બ્રાન્ચે સાગર તાંબે અને તેના ત્રણ સાથીઓની ધરપકડ કરી હતી. પોલીસે તેમની પાસેથી ૨૬.૫ કિલો ચાંદી અને અન્ય ચોરીનો સામાન, જેમાં એક વાહનનો પણ સમાવેશ થાય છે, જપ્ત કર્યો હતો. આરોપીઓએ સુમિતકુમાર શાહની દુકાન સહિત વિવિધ સ્થળોએ ચોરીની કબૂલાત કરી હતી.
આ કેસમાં દુકાનમાં ચોરી બદલ તાંબેને દોષિત ઠેરવવામાં આવ્યો હતો. સુમિતકુમાર શાહની દુકાનમાંથી ચોરાયેલી ચાંદી અલગ સ્વરૂપમાં હતી, પરંતુ તે ઓગાળીને દાણાદારમાં રૂપાંતરિત થઈ ગઈ હતી.
ફોજદારી કેસ પૂરો થયા પછી, ફરિયાદીએ કોર્ટમાંથી તેની ચાંદી પાછી માંગી હતી, પરંતુ એપ્રિલ 2017 માં મેટ્રોપોલિટન કોર્ટે તેની અરજી ફગાવી દીધી હતી. જોકે, નવેમ્બર 2017 માં, શહેરની સેશન્સ કોર્ટે પોલીસને મુદ્દામાલ નંબર 20 અને નંબર 21 તરીકે ચિહ્નિત ચાંદી પરત કરવાનો નિર્દેશ આપ્યો હતો. ચાંદીની કામચલાઉ કસ્ટડી ફરિયાદીને સોંપવાનો આદેશ આપવામાં આવ્યો હતો.
આ પછી પણ ફરિયાદી સાત વર્ષ સુધી ચાંદીની કસ્ટડી મેળવવામાં નિષ્ફળ રહ્યા હતા તેથી હાઇકોર્ટમાં રજૂઆત કરવામાં આવી હતી. વાસ્તવમાં આરોપીઓ સામે જુદા જુદા વિસ્તારમાં સોના ચાંદીની ચોરીની અન્ય ફરિયાદ પણ થઇ હતી અને મુદ્દામાલ બીજાનો પણ હોઈ શકે છે તે મુદ્દો ઉપસ્થિત થયો હતો.
હાઇકોર્ટમાં કરેલી અરજીમાં ભારપૂર્વક જણાવ્યું છે કે તેઓ 2012 થી તેમના ચાંદીના મુદ્દમાલને મુક્ત કરાવવા માટે પ્રયાસ કરી રહ્યા છે, અને 2017 માં કોર્ટના આદેશ છતાં, તેઓ નિષ્ફળ રહ્યા હતા. તેમના ચાંદીનું ચોક્કસ સ્થાન શોધી શકાતું નથી અને પોલીસ અધિકારીઓ માટે પણ અગમ્ય છે.
આ અરજી બાદ હાઇકોર્ટે ગુજરાત યુનિવર્સિટી, વેજલપુર, નારણપુરા અને ઊંઝા પોલીસ સ્ટેશન અને ડીસીબી ક્રાઇમ બ્રાન્ચને નોટિસ ફટકારી છે, જેમાં 20 ફેબ્રુઆરી સુધીમાં જવાબ માંગવામાં આવ્યો છે.
