અમદાવાદ : નશામાં ધૂત કારચાલકે સાઉથની ફિલ્મ જેમ ગાડી હંકારી બે યુવકોના જીવ લીધા, મનુષ્યવધનો ગુન્હો દાખલ
અમદાવાદમાં થોડા દિવસ પહેલા જ નબીરાએ બેફામ કાર ચલાવીને ધોળા દિવસે અકસ્માત સર્જ્યો હતો અને બીજા વાહનોને પણ અડફેટે લીધા હતા ત્યારે શહેરમાં વધુ એક નશામાં ધુત્ત નબીરાએ બેફામ કાર હંકારીને અકસ્માત સર્જ્યો હતો અને બે લોકોને હડફેટે લેતા તેમના મોત નિપજ્યાં હતા. ત્યારે ઘટના સ્થળે લોકોના ટોળાં ઉમટી પડ્યા હતા અને પોલીસને જાણ થતાં તે પણ બનાવસ્થળે દોડી આવી હતી અને આરોપીની ધરપકડ કરીને માનવવધનો ગુનો દાખલ કર્યો છે.
અમદાવાદ શહેરના માર્ગો હવે સામાન્ય જનતા માટે સુરક્ષિત રહ્યા નથી. અમદાવાદના નરોડા-દહેગામ રોડ પર એક શખ્સે નશાની હાલતમાં પૂરપાટ ઝડપે બેફામ કાર હંકારી બે યુવકોનો ભોગ લીધો હતો. અકસ્માત સર્જ્યા બાદ લોકોનું ટોળું ભેગું થઇ ગયું હતું અને પીધેલી હાલતમાં ડ્રાઇવિંગ કરી રહેલા કારચાલકને મેથીપાક ચખાડ્યો હતો. ઘટનાની જાણ થતાં પોલીસની ટીમ દોડી આવી હતી. સમગ્ર ઘટનાના સીસીટીવી પણ વાયરલ થયા છે જેમાં જોઈ શકાય છે કે નબીરો સાઉથની ફિલ્મોની જેમ બેફામ ગાડી ચલાવી રહ્યો હતો.
રવિવારે મોડી રાત્રે નરોડા-દહેગામ રોડ પર એક્ટિવા પર બે યુવકો જઇ રહ્યા હતા. આ દરમિયાન પીધેલી હાલતમાં કાર ચલાવી રહેલા ગોપાલ પટેલ નામના શખ્સે પૂરપાટ ઝડપે કાર ડિવાઇડર ચઢાવી દેતાં કાર ડિવાઇડર કૂદી રોંગ સાઇડમાં જતી રહી હતી. આ દરમિયાન સામેથી આવી રહેલા અમિત રાઠોડ અને વિશાલ રાઠોડની એક્ટિવાને કારની ટક્કર વાગતાં બંને યુવકોના ઘટનાસ્થળે જ મોત નિપજ્યા હતા. કાર ચાલક ગોપાલ પટેલ નામનો શખ્સ નશામાં ટલ્લી હતો અને લથડીયા ખાતો હતો. આ અકસ્માતના સીસીટીવી પણ સામે આવ્યા છે. પોલીસે અકસ્માતનો ગુનો નોંધી વધુ તપાસ હાથ ધરી છે. આરોપીની ધરપકડ કરી તેના વિરૂદ્ધ માનવવધનો ગુનો દાખલ કરવામાં આવ્યો છે.
2024ના છ મહિનામાં જ દારૂ પીને વાહન ચલાવવાના 14775 કિસ્સા નોંધાયા છે, જ્યારે 2020 થી 2023 દરમ્યાન હિટ એન્ડ રનના 4860 કેસોમાં 3449નાં મોત થયાં છે અને 2720ને ઇજાઓ થઇ છે.
