FBI જેને શોધે છે એ વિકાસ યાદવની દિલ્હી પોલીસે ડિસેમ્બરમાં ધરપકડ કરી હતી
- અપરણ અને ખંડણીના કેસમાં ઝડપાયો હતો: હાલ જામીનમુક્ત છે:લોરેન બિશ્નોઇએ સોપારી આપી હોવાનું જણાવ્યું હતું.
અમેરિકા સ્થિત શીખ આતંકવાદી ગુરુપત્વાન સિંઘ પન્નુમની હત્યા કરવાનું ષડયંત્ર રચવાના આરોપસર અમેરિકાની એફબીઆઈએ જેને વોન્ટેડ જાહેર કર્યો છે તે કથિત રીતે રો ના ભૂતપૂર્વ અધિકારી વિકાસ યાદવની દિલ્હી પોલીસે ડિસેમ્બર મહિનામાં અપહરણ અને ખંડણીના આરોપસર ધરપકડ કરી હોવાનું પ્રકાશમાં આવ્યું છે. આશિષ યાદવ હાલ જામીન મુક્ત છે. એફબીઆઈએ હવે જ્યારે તેને વોન્ટેડ જાહેર કર્યો છે ત્યારે એ શખ્સ એક સમયે પોલીસ કસ્ટડીમાં હોવાનું ખુલ્યા બાદ અમેરિકી સરકાર તેના પ્રત્યાર્પણ માટે ભારત સરકાર પાસે માગણી કરી શકે છે તેવું માનવામાં આવે છે.
પ્રાપ્ત વિગતો મુજબ દિલ્હીના રોહિણી વિસ્તારમાં રહેતા એક શખ્સે યાદવ અને તેના સાથે સામે અપહરણ અને ખંડણીની ફરિયાદ નોંધાવી હતી. તેમાં જણાવ્યા અનુસાર યાદવે પોતાની ઓળખ સિનિયર સરકારી અધિકારી અને અંડરકવર એજન્ટ તરીકે આપી હતી. યાદવે ફરિયાદીના વિદેશના સંપર્કો અને નાણાકીય વ્યવહારોમાં રસ દાખવ્યો હતો.
11 ડિસેમ્બરના રોજ યાદવે એક મહત્વની મીટીંગ હોવાનું જણાવી ફરિયાદીને લોધી રોડ ઉપર બોલાવ્યો હતો અને ત્યાંથી તે અને તેનો એક સાથી ફરિયાદીનું અપહરણ કરી ડિફેન્સ કોલોની પાસેના એક ફ્લેટમાં લઈ ગયા હતા.તેની હત્યા કરવાનો દુબઈની કોઈ વ્યક્તિ વતી લોરેન બિશ્નોઇએ આદેશ કર્યો હોવાનું યાદવે જણાવ્યું હતું અને માર મારી સોનાનો ચેન અને વીંટી લૂંટી લીધા હતા. બાદમાં ફરીયાદીને તેના કાફે ખાતે લઈ ગયા હતા અને ત્યાંથી પણ પૈસાની લૂંટ ચલાવી હતી.
આ અંગે પોલીસ ફરિયાદ નોંધાયા બાદ દિલ્હી પોલીસે બીજા જ દિવસે યાદવ અને તેના સાથીને ઝડપી લીધા હતા. 23 મી ડિસેમ્બરે તેને તિહાર જેલમાં લઈ જવાયો હતો. બાદમાં 22મી માર્ચે પુત્રીની માંદગી સબબ તેણે કરેલી વચગાળાના જામીનની અરજી દિલ્હીની સેશન્સ કોર્ટે માન્ય રાખી હતી. 22મી એપ્રિલે તેને કાયમી જામીન મળી ગયા હતા.
અત્રે ઉલ્લેખનીય છે કે એફબીઆઈએ તેની ઓળખ સીસી 1 તરીકે જાહેર કરી તેના થોડા દિવસ બાદ જ આ ઘટના બની હતી. દરમિયાન અમેરિકાએ કરેલા આક્ષેપો ની તપાસ માટે ભારત સરકારે નિમેલી ઉચ્ચ સ્તરીય સમિતિએ અમેરિકાની મુલાકાત લીધી અને તપાસની પ્રગતિ અને પુરાવાઓ સુપ્રત કર્યા બાદ પ્રથમ વખત એફબીઆઇ એ તેનું નામ જાહેર કર્યું હતું.