એક મહિના સુધી ચા ન પીવાથી શરીરમાં કેવા ફેરફાર આવે છે ? જાણો ચા ફાયદાકારક છે કે હાનિકારક

ચા દુનિયાભરમાં સૌથી વધુ પીવાતા બ્રેવરેજમાં સામેલ છે. તેની લોકપ્રિયતા લોકોમાં અનહદ જોવા મળે છે. અમુક લોકોની તો સવાર જ ચાથી પડે છે અને દિવસમાં અનેકવાર ચા પીવાની ટેવ હોય છે. અન્ય દેશોમાં માથામાં દુખાવો થતો હોય તો દવા લે છે અને આપણાં દેશમાં જો માથું દુખતું હોય તો પણ ચા પીવે છે. ચા પીવી ફાયદાકારક છે કે હાનિકારક એ બાબતે અનેકવાર લાંબી ચર્ચા થતી હોય છે. ત્યારે અભ્યાસમાં મિશ્ર પરિણામો પણ જોવા મળ્યા છે. કેટલાક સંશોધનો સૂચવે છે કે દૂધની ચાને બદલે કાળી ચા પીવાથી ઘણા સ્વાસ્થ્ય લાભ થઈ શકે છે, જ્યારે કેટલાક સંશોધકોનું માનવું છે કે ચામાં કેફીનની હાજરીને કારણે, તેના નિયમિત અથવા વધુ પડતા સેવનથી ઘણી આડઅસર પણ થઈ શકે છે.

આ લેખમાં આપણે એ સમજવાનો પ્રયત્ન કરીશું કે જો વ્યક્તિ 30 દિવસ સુધી ચા બિલકુલ ન પીવે તો શરીરમાં કેવા પ્રકારના ફેરફારો થઈ શકે છે?

આરોગ્ય નિષ્ણાતો કહે છે કે, જોકે મર્યાદિત માત્રામાં ચા પીવાને સામાન્ય રીતે મોટાભાગના લોકો માટે હાનિકારક માનવામાં આવતું નથી, પરંતુ જો તમે તેને દિવસમાં ચાર-પાંચ વખત વધારે પીવો છો, તો તેની કેટલીક આડઅસર થઈ શકે છે. મોટાભાગની સમસ્યાઓ ચામાં રહેલા કેફીન અને ટેનીનને કારણે થાય છે. તો ચા છોડી દેવામાં આવે તો શું ફાયદો થઈ શકે?

આહારશાસ્ત્રીઓ શું કહે છે ?

સીમિત માત્રામાં ચા પીવી એ નુકસાનકારક કહી શકાય નહીં. જો તમે દૂધ અને ખાંડ વગરની કાળી ચાનું સેવન કરો છો અને જેમાં રોગપ્રતિકારક શક્તિ વધારતા મસાલા હોય છે, તો તેના ઘણા ફાયદા પણ થઈ શકે છે. પરંતુ જો તમે દરરોજ 4-5 વખત દૂધ સાથે ચા પીતા હોવ તો ચોક્કસ લાંબા ગાળાના નુકસાન કરે છે.

એક મહિના સુધી ચા છોડી દેવાથી શરીરમાં સ્વસ્થ બદલાવ આવી શકે છે. 30 દિવસ માટે કેફીનનું સેવન ઓછું કરવાથી સારી ઊંઘ, ઓછી ચિંતા અને પાચન સ્વાસ્થ્યમાં સુધારો થઈ શકે છે.

ઊંઘની સમસ્યામાં સુધારો થવા લાગે છે

ચામાં કુદરતી રીતે કેફીન હોય છે, તેથી તેનું વધુ પડતું સેવન તમારા ઊંઘના ચક્રને વિક્ષેપિત કરી શકે છે. કેટલાક સંશોધનો સૂચવે છે કે વધુ પડતી કેફીનનું સેવન મેલાટોનિન હોર્મોનના ઉત્પાદનમાં વિક્ષેપ પાડી શકે છે. આ હોર્મોન મગજને સંકેત આપે છે કે સૂવાનો સમય થઈ ગયો છે. થાક ઉપરાંત યાદશક્તિની કમી, ઉંઘ ન આવવાથી સ્થૂળતા અને બ્લડ શુગર કંટ્રોલ ન થવા જેવી સમસ્યાઓ પણ વધી શકે છે.

કેફીનનું વ્યસન દૂર થવા લાગે છે

કેફીન એ આદત બનાવનાર ઉત્તેજક છે, જેના કારણે તમને વારંવાર ચા કે કોફી પીવાનું મન થાય છે. સમયસર ચા ન મળવાથી માથાનો દુખાવો, ચીડિયાપણું, હૃદયના ધબકારા વધવા અને થાક જેવી સમસ્યાઓ પણ થઈ શકે છે.

એક મહિના સુધી ચા અને કોફી જેવી કેફીન ધરાવતી વસ્તુઓથી દૂર રહેવાથી કેફીનનું વ્યસન પણ સમય સાથે ઓછું થવા લાગે છે. તે શારીરિક અને માનસિક બંને સ્વાસ્થ્ય માટે ફાયદાકારક છે.

પાચન સંબંધી સમસ્યાઓથી રાહત

ચાની ભૂકીમાં હાજર ટેનીનનું વધુ પ્રમાણ પાચનમાં સમસ્યાનું કારણ બને છે, તેથી જ કેટલાક લોકો વધુ પડતી ચા પીવાથી ગેસની રચના, ઉબકા અથવા પેટમાં દુખાવો જેવા અસ્વસ્થતા લક્ષણો અનુભવી શકે છે. નિયમિત અથવા રોજ વધુ પડતી ચા પીવાથી પાચન સંબંધી ગંભીર સમસ્યાઓ થઈ શકે છે.

એક મહિના સુધી ચા કે કેફીન ધરાવતી વસ્તુઓથી દૂર રહેવાથી પાચન સંબંધી સમસ્યાઓ દૂર થવા લાગે છે અને કબજિયાત અને અપચોનું જોખમ ઓછું થાય છે. તે પાચન સુધારવા માટે પણ ફાયદાકારક છે.

અસ્વીકરણ: આ લેખમાં આપવામાં આવેલી માહિતી સામાન્ય માહિતી પર આધારિત છે. સ્વાસ્થ્ય સંબંધિત કોઈપણ વધુ માહિતી માટે હંમેશા નિષ્ણાત અથવા તમારા ડૉક્ટરની સલાહ લો.