રણચંડી બનેલી નર્સે દુષ્કર્મનો પ્રયાસ કરનાર તબીબનું ગુપ્તાંગ વાઢી નાખ્યું
બિહારની બહાદુર મહિલાનું પ્રેરણાદાયી કૃત્ય
બિહારના સમસ્તીપુર જિલ્લામાં એક ખાનગી હોસ્પિટલમાં તબીબ અને તેના બે સાથીઓએ હોસ્પિટલમાં ફરજ બજાવતી 25 વર્ષની નર્સ ઉપર દુષ્કર્મ કરવાનો પ્રયાસ કરતાં નર્સે બ્લેડ વડે તબીબનું ગુપ્તાંગ વાઢી નાખ્યું હતું. પોલીસે આ ઘટનામાં તબીબ અને તેના બે મળતીયાઓની ધરપકડ કરી હતી. ગુપ્તાંગ ગુમાવનાર તબીબને લોહી લુહાણ હાલતમાં હોસ્પિટલે ખસેડવામાં આવ્યો હતો.
પોલીસના જણાવ્યા મુજબ સમસ્તીપુર જિલ્લાના ગંગાનગરમાં આરબીએસ હેલ્થ કેર સેન્ટર નામની ખાનગી હોસ્પિટલમાં હોસ્પિટલમાં ગુરુવારે રાત્રે આ ઘટના બની હતી. હોસ્પિટલના તબીબ તથા સંચાલક ડોક્ટર સંજય કુમાર તથા તેના બે સાથીઓ નશાની હાલતમાં હતા. તેમણે હોસ્પિટલના દરવાજા અંદરથી બંધ કરી સીસીટીવી કેમેરા પણ સ્વીચ ઓફ કરી દીધા હતા. બાદમાં તબીબે નર્સ ઉપર દુષ્કર્મનો પ્રયાસ કર્યો હતો. જોકે તેને તાબે થઈ જવાને બદલે રણચંડી બનેલી નર્સે પૂરી તાકાતનસાથે સામનો કર્યો હતો અને બ્લેડ વડે વાસનાંધ તબીબનું ગુપ્તાંગ વાઢી નાખ્યું હતું. નર્સનું આ રૂપ નિહાળી તબીબ અને તેના સાથીઓ સ્તબ્ધ બની ગયા હતા અને એ દરમિયાન મોકો જોઈ નર્સ બહાર ભાગી ગઈ હતી.
બાદમાં હોસ્પિટલનો દરવાજો બહારથી બંધ કરી તેણે પોલીસને જાણ કરતા પોલીસ કાફલો ઘટના સ્થળે દોડી ગયો હતો અને તબીબ સંજયકુમાર, અવધેશકુમાર અને સુનિલકુમાર ગુપ્તાની ધરપકડ કરી હતી.
