સાણંદમાં સેમિકંડક્ટર યુનિટમાં રોજ 60 લાખ ચિપ્સ બનશે
કેન્દ્રીય કેબિનેટે લીધા મહત્વના નિર્ણય
ખેડૂતોને 20 મિનિટમાં જ લોન : ડિજિટલ કૃષિ મિશન સહિતના કાર્યક્રમો માટે રૂપિયા 14 હજાર કરોડના ખર્ચને મંજૂરી
કેન્દ્રીય મંત્રી મંડળે સોમવારે દેશના કૃષિ ક્ષેત્ર સાથે સંબંધિત 7 મોટા કાર્યક્રમો માટે રૂપિયા 14 હજાર કરોડના ખર્ચને મંજૂરી આપી હતી. જેમાં ડિજિટલ કૃષિ મિશન અને ખેતીના પાક સાયન્સ માટેની યોજનાઓ પણ શામેલ કરાઇ છે. ખેડૂતોને રાહત આપવાનો પણ નિર્ણય લેવાયો હતો.
કેન્દ્રીય કેબિનેટે ગુજરાતના સાણંદમાં સેમીકન્ડક્ટર યુનિટ સ્થાપવા માટે કેનેસ સેમીકોન પ્રાઇવેટ લિમિટેડના પ્રસ્તાવને મંજૂરી આપી હતી. પ્રસ્તાવિત યુનિટ 3,300 કરોડ રૂપિયાના રોકાણથી સ્થાપિત કરવામાં આવશે. આ યુનિટની ક્ષમતા દૈનિક 60 લાખ ચિપ્સની હશે.
આ યુનિટમાં ઉત્પન્ન થનારી ચિપ્સ વિવિધ પ્રકારના એપ્લિકેશનો માટે ઉપયોગમાં લેવામાં આવશે, જેમાં ઔદ્યોગિક, ઓટોમોટિવ, ઈલેક્ટ્રિક વાહન, વપરાશકર્તા ઇલેક્ટ્રોનિક્સ, ટેલિકોમ્યુનિકેશન, મોબાઇલ ફોન વગેરે જેવા ક્ષેત્રો શામેલ છે.
કેબિનેટમાં એવો નિર્ણય થયો હતો કે હવે ખેડૂતોને કર્જ માટે લાંબા સમય સુધી રાહ જોવી નહીં પડે અને 20 મિનિટમાં જ લોન પાસ થઈ જશે. કેન્દ્રીય મંત્રી અશ્વિની વૈષ્ણવે આ અંગેની માહિતી મીડિયાને આપી હતી. સરકાર કૃષિ ક્ષેત્રને આગળ વધારવા માંગે છે.
વૈષ્ણવે કહ્યું હતું કે કેબિનેટે ડિજિટલ કૃષિ મિશન માટે રૂપિયા 2817 કરોડની યોજના અને ખેતી માટે પાક વિજ્ઞાન યોજના માટે રૂપિયા 3979 કરોડના ખર્ચને મંજૂરી આપી હતી. આ ઉપરાંત પશુધન આરોગ્ય માટે રૂપિયા 1702 કરોડ ખર્ચવામાં આવશે.
